दार्चुला- करिब तीन दशकदेखि बन्द रहेको गोकुलेश्वर विमानस्थल पुनर्निर्माणको काम बजेट अभावका कारण अलपत्र परेको छ।
शैल्यशिखर नगरपालिका–९, गोकुलेश्वरमा रहेको विमानस्थलमा चार वर्षअघि केएस कन्स्ट्रक्सन प्रालि धनगढीले फिलिङ र ग्याबिनको काम सुरु गरे पनि त्यसपछि बजेट नआएपछि निर्माण कार्य अलपत्र परेको हो।
२०४६ सालमा सञ्चालनमा आएको विमानस्थल २०५० सालदेखि बन्द छ। २०६० सालदेखि कार्यालय सहयोगीका भरमा छाडिएको विमानस्थल अहिले जीर्ण भइसकेको छ। भवन भग्नावशेषमा परिणत भएको छ भने धावनमार्ग (रनवे) खेलमैदान र गौचरनमा रूपान्तरण भएको छ।
आर्थिक वर्ष २०७७/७८ मा अर्थ मन्त्रालयले पुनर्निर्माणका लागि ५० करोड ४९ लाख ४९ हजार बजेट सुनिश्चित गरे पनि पछिल्ला वर्षमा निकासा नहुँदा कार्य प्रगति न्यून भएको शैल्यशिखर नगरपालिकाका प्रमुख विजयसिंह धामीले बताए।
हवाई सेवा सञ्चालन भए दार्चुलासहित बैतडी र बझाङका नागरिकले सुविधा पाउने भए पनि बजेट नआउँदा निर्माण अधुरै रहेको स्थानीयको गुनासो छ। हवाई सुविधा नहुँदा झन्डै साढे तीन सय किलोमिटर सडकमार्ग हुँदै मात्र सदरमुकाम पुग्नुपर्ने बाध्यता रहेको उनीहरूले बताएका छन्।
दार्चुलाको विकासका लागि महत्वपूर्ण मानिएको गोकुलेश्वर विमानस्थल छिटो पुनर्निर्माण गरी सञ्चालनमा ल्याउनुपर्ने स्थानीयवासीको जोडदार माग रहेको छ।
