चितवन —राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछानेविरुद्ध सहकारीपीडितले शुक्रबार दिउँसो उनकै निर्वाचन क्षेत्र मुग्लिन बजारमा प्रदर्शन गरेका छन् ।
उनको निर्वाचन क्षेत्रअन्तर्गतको इच्छाकामना गाउँपालिकाको मुग्लिन बजारमा ‘सहकारीपीडितलाई न्याय दे’ लगायतका नाराबाजी गर्दै लामिछानेविरुद्ध प्रदर्शन भएको हो । लामिछाने आफ्नो निर्वाचन क्षेत्रमा सार्वजनिक सुनुवाइ कार्यक्रम गर्न गएका बेला ब्यानरसहित प्रदर्शन गरिएको हो ।
मुग्लिन बजारमा उनले तेस्रो सार्वजनिक सुनुवाइ गरेका हुन् । कार्यक्रम सकेर फर्कने क्रममा लामिछानेविरुद्ध प्रदर्शन भएको प्रत्यक्षदर्शी स्थानीय सुशान्त केसीले बताए । उनका अनुसार रवि लक्षित प्रदर्शन भएपछि उनी अर्कै बाटोबाट चितवन फर्किएका थिए । रास्वापा समर्थक तथा प्रदर्शनकारीबीच केही विवाद र धकेलाधकेलसमेत भएको थियो ।
इलाका प्रहरी कार्यालय मुग्लिनका प्रहरी निरीक्षक निराला भण्डारीले सुनुवाइ कार्यक्रमपछि वैकल्पिक बाटोबाट लामिछानेलाई भरतपुर पठाएको उनले बताइन् । चितवन भरतपुर महानगरपालिका–३ मा मुख्य कार्यालय रहेको सहारा चितवन बहुउद्देश्यीय सहकारी संस्थाबाट अवैधानिक रूपमा गोरखा मिडियामा करोडौं रुपैयाँ गएको पुष्टि भएको छ । गोर्खा मिडियामा लामिछाने राजनीतिमा आउनुअघि साझेदार रहेका थिए ।
सहारा चितवनका पीडित बचतकर्ताहरूले संघर्ष समिति नै गठन गरेर डेढ वर्षदेखि आन्दोलन गर्दै आएका छन् । तर मुग्लिनको प्रदर्शनमा संघर्ष समिति सामेल नभएको संयोजक शालिकराम दुवाडीले बताए । ‘हामी त्यहाँ गएका हैनौं । हामीले आज प्रदर्शन गर्ने निर्णय या कुनै तयारी गरेका थिएनौं । अन्य पीडितहरूले प्रदर्शन गरेका होलान्,’ दुवाडीले भने ।
