धनगढी – गत विहिबारदेखि धनगढीमा सञ्चालन भएको “आरम्भ ल फेस्ट” सम्पन्न भएको छ ।
कानुनी शिक्षा अभिवृद्धि गर्ने उद्धेश्यले आरम्भ कानुनी शिक्षा केन्द्र धनगढी र नयाँ युवा नयाँ सोच सेवा समाज नेपालको आयोजना तथा आन्तरिक मामिला तथा कानुन मन्त्रालय सुदुरपश्चिमको प्रवद्र्धन र ड्रिमलिङ्क एजुकेशन धनगढी शाखाको मुख्य प्रायोजनमा माध्यमिक तहमा कानुन विषय अध्ययनरत विद्यार्थीहरुबिच विभिन्न पाँचवटा विधाहरु, पहिलो दिन कानुनी कविता र कानुनी मस्यौदा लेखन, दोस्रो दिन कानुनी हाजिरीजवाफ र सिर्जनात्मक लेखन तथा तेस्रो र चौथो दिन संसदिय वहस प्रतियोगिता आयोजना गरिएको हो ।
जसमा हाजिरीजवाफ, सिर्जनात्मक लेखन र संसदिय वहसमा प्रथम स्थान हाँसिल गर्दैै ६० अंक सहित एक्सिस विद्याश्रमले उपाधि हात पारेको छ ।
त्यसैगरी कानुनी कविता र कानुनी मस्यौदा लेखनमा प्रथम स्थान हाँसिल गर्दै ४५ अंक सहित सुदूरपश्चिमाञ्चल एकेडेमी (एस.पि.ए) उपविजेता बन्यो । त्यस्तै त्रिनगर माध्यमिक विद्यालय हाजिरी जवाफमा द्धितीय स्थान हाँसिल गर्दै ४० अंक सहित तेस्रो र २० अंक सहित धनगढी नमुना मा.वि.ले सान्त्वना स्थान प्राप्त गर्यो ।
सहभागी सबैलाई प्रमाणपत्र तथा विजेता, उपविजेता सहित विभिन्न स्थान प्राप्त टिमलाई सिल्ड, मेडल र प्रमाणपत्र प्रदान गरिएको छ ।
यस्तै कार्यक्रमका सभापति एवं आरम्भ कानुनी शिक्षा केन्द्र धनगढीका संयोजक ओम प्रकाश वस्तीद्वारा लिखित स्नातक तहमा कानुन संकाय अध्ययन गर्ने विद्यार्थीहरुका लागि प्रवेश परिक्षा तयारी गर्न आवश्यक पर्ने “ईन्ट्रान्स एमिकस” पुस्तकको भर्चुअल विमोचन पनि गरिएको छ ।
