जिल्ला अदालत काठमाडौंले धितोपत्र तथा बिमासम्बन्धी कसुरमा पक्राउ परेका बिचौलिया दीपक भट्ट र व्यवसायी सुलभ अग्रवाललाई धरौटीमा रिहा गर्न आदेश दिएको छ।
न्यायाधीश शिवप्रसाद आचार्यको इजलासले बिहीबार थुनछेक आदेश जारी गर्दै बिमासम्बन्धी कसुरमा सुलभ अग्रवालसँग २ करोड रुपैयाँ र दीपक भट्टसँग १ करोड ५० लाख रुपैयाँ धरौटी माग गरेको हो।
यस्तै, धितोपत्रसम्बन्धी कसुरमा अग्रवालसँग थप १ करोड ५० लाख रुपैयाँ तथा भट्टसँग १ करोड रुपैयाँ धरौटी माग गरिएको अदालतले जनाएको छ।
जिल्ला अदालत काठमाडौंले एक सातासम्म निरन्तर सुनुवाइ गरेपछि बिहीबार थुनछेक आदेश जारी गरेको हो।
यसैबीच, हिमालयन रिइन्स्योरेन्सको संस्थापक सेयर बिक्रीसँग सम्बन्धित छुट्टै मुद्दामा अदालतले व्यवसायी सुलभ अग्रवालसँग थप २ करोड ३० लाख रुपैयाँ धरौटी माग गरेको छ।
