धनगढी- बझाङको बित्थडचिर गाउँपालिकाले करारमा कार्यरत कर्मचारीलाई तत्काल नहटाउने तथा उनीहरूको सेवालाई निरन्तरता दिने निर्णय गरेको छ। करार कर्मचारी हटाउने वा राख्ने विषयमा लामो समयदेखि चलिरहेको विवाद अन्ततः करार कर्मचारीको पक्षमा टुंगिएको हो।
सोमबार बसेको गाउँ कार्यपालिका बैठकले लामो छलफलपछि हाल कार्यरत करार कर्मचारीलाई यथावत् राख्ने निर्णय गरेको गाउँपालिका स्रोतले जनाएको छ।
असारको पहिलो सातादेखि करार कर्मचारीको सेवा अवधि थप्ने वा नथप्ने विषय कार्यपालिकामा निरन्तर छलफलको विषय बनेको थियो। उक्त विषय सार्वजनिक भएपछि करार कर्मचारीहरूले आफूहरू लामो समयदेखि सेवा गर्दै आएको उल्लेख गर्दै सेवा निरन्तरता दिनुपर्ने माग गर्दै आएका थिए। अन्ततः कार्यपालिकाले तत्कालका लागि करार कर्मचारी नहटाउने निर्णय गरेको हो।
यसअघि विभिन्न सञ्चारमाध्यममा बित्थडचिर गाउँपालिकाले विभिन्न शाखामा कार्यरत करिब ११० जना करार कर्मचारीको सेवा अवधि आगामी श्रावणदेखि नथप्ने निर्णय गरेको समाचार सार्वजनिक भएका थिए। गाउँपालिकाले आन्तरिक आयको अभाव र संघीय सरकारको स्वीकृत दरबन्दीभन्दा बाहेक कर्मचारी नराख्न दिएको निर्देशनलाई आधार बनाउँदै यस्तो निर्णय गरेको बताएको थियो।
गाउँपालिकाका अनुसार सीमित आर्थिक स्रोतका कारण करार कर्मचारीको तलबभत्ता व्यवस्थापन गर्न कठिन भएको भन्दै शिक्षक, प्राविधिक, प्रशासन सहायक, मनोसामाजिक परामर्शकर्ता लगायत विभिन्न क्षेत्रमा कार्यरत करार कर्मचारीको म्याद नथप्ने तयारी गरिएको थियो।
तर, पछिल्लो कार्यपालिका बैठकले उक्त निर्णयमा पुनर्विचार गर्दै हालका लागि करार कर्मचारीलाई निरन्तरता दिने निर्णय गरेको हो। यससँगै श्रावणदेखि सेवा समाप्त हुने अन्योलमा रहेका करार कर्मचारीले तत्काल राहत पाएका छन्।
यद्यपि, गाउँपालिकाले दीर्घकालीन रूपमा कर्मचारी व्यवस्थापन, आर्थिक क्षमता र कानुनी प्रावधानलाई मध्यनजर गर्दै आवश्यक निर्णय लिइने जनाएको छ।
Advertisement
