धनगढी- बझाङको केदारस्युँ गाउँपालिका-७ र दुर्गाथलि गाउँपालिका- ६ सुँगरेमा शनिबार भएको जीप दुर्घटनाको प्रारम्भिक अनुसन्धानले कच्ची सडकमा क्षमताभन्दा बढी यात्रु बोकेर यात्रा गर्नु दुर्घटनाको मुख्य कारण रहेको देखाएको छ।
सुदूरपश्चिम प्रदेश ट्राफिक प्रहरी कार्यालयका अनुसार सुपप्र ०१-००१ च २६६४ नम्बरको जीप वर्षाका बेला हिलाम्मे कच्ची सडकमा क्षमताभन्दा बढी यात्रु बोकेर बुंगलबाट दुर्गाथलीतर्फ जाँदै थियो। जीपमा चालकसहित १६ जना सवार रहेका थिए।
दुर्घटना भएको स्थान उकालो र घुम्ती भएको सडक खण्ड हो। वर्षाका कारण सडक चिप्लो बनेको र अत्यधिक भारका कारण जीपले उकालो चढ्न नसकेपछि चालकले ब्याक गरेर घुम्ती काट्ने प्रयास गरेका थिए। सो क्रममा जीप नियन्त्रणबाहिर गई भीरतर्फ करिब ३०० मिटर तल खसेर दुर्घटना भएको प्रारम्भिक अनुसन्धानबाट खुलेको छ।
सुदूरपश्चिम प्रदेश ट्राफिक प्रहरी कार्यालयका प्रमुख प्रहरी उपरीक्षक (एसपी) नवराज कार्कीका अनुसार उकालोमा जीप चढ्न नसकेपछि ब्याक गर्दा दुर्घटना भएको देखिएको छ। घटनाबारे थप अनुसन्धान जारी रहेको उनले बताए।
दुर्घटनामा तीन जनाको घटनास्थलमै मृत्यु भएको थियो भने सात जना गम्भीर घाइते भएका छन्। जीप चालक देवेन्द्र धामी पनि गम्भीर घाइते छन्।
गम्भीर घाइते सात जनालाई आइतबार नेपाली सेनाको हेलिकोप्टरमार्फत नेपालगञ्ज लगिएको थियो। उनीहरूमध्ये पाँच जनाको नेपालगञ्जमै उपचार भइरहेको छ भने चालक देवेन्द्र धामी र दुर्गाथली गाउँपालिकाका रामबहादुर महतलाई थप उपचारका लागि काठमाडौंस्थित ट्रमा सेन्टर रेफर गरिएको बझाङका प्रहरी नायब उपरीक्षक (डीएसपी) टेकबहादुर जोराले जानकारी दिएका छन्।
सुदूरपश्चिमका पहाडी जिल्लामा स्थानीय तहहरूले मापदण्डविपरीत निर्माण गरेका कच्ची तथा अव्यवस्थित ग्रामीण सडक र क्षमताभन्दा बढी यात्रु बोक्ने प्रवृत्तिका कारण हरेक वर्ष सवारी दुर्घटनामा धेरै नागरिकले ज्यान गुमाइरहेका छन्। यसले सडक सुरक्षा, सवारी नियमन र पूर्वाधारको गुणस्तरमा थप ध्यान दिनुपर्ने आवश्यकता औँल्याएको छ।
