काठमाडौं- मुगुका गणेश नेपालीको मृत्यु प्रकरणलाई लिएर प्रधानमन्त्री बालेन शाहको राजीनामा माग गर्दै संसद् र सडक दुवैतर्फबाट विरोध चर्किएको छ। त्रिपुरेश्वरमा बिहीबार नगर प्रहरीसँग भएको विवादपछि गणेश नेपालीले आफ्नै शरीरमा पेट्रोल छर्केर आगो लगाएका थिए। गम्भीर घाइते भएका उनको शुक्रबार बिहान वीर अस्पतालमा उपचारका क्रममा मृत्यु भएको हो।
घटनापछि प्रतिनिधिसभा र राष्ट्रिय सभामा सांसदहरूले सरकारको भूमिकामाथि प्रश्न उठाउँदै प्रधानमन्त्री शाहको मौनताको आलोचना गरेका छन्। साथै, काठमाडौंको माइतीघरमा प्रदर्शनमा उत्रिएका युवाहरूले पनि प्रधानमन्त्रीको राजीनामा माग गर्दै नाराबाजी गरेका छन्।
प्रतिनिधिसभामा बोल्दै प्रमुख प्रतिपक्ष दल नेपाली कांग्रेसकी प्रमुख सचेतक बासना थापाले गणेश नेपालीको मृत्यु प्रकरणमा प्रधानमन्त्री शाह मौन बसेको भन्दै आपत्ति जनाइन्। विपक्षमा हुँदा राज्यका कमजोरीमाथि कडा प्रश्न उठाउने प्रधानमन्त्री अहिले सरकारको नेतृत्वमा रहँदा किन मौन रहेको भन्दै उनले प्रश्न गरिन्। नागरिकको सुरक्षा सुनिश्चित गर्न सरकार असफल भएको आरोप लगाउँदै उनले “अब कालो चश्मा खोल्ने बेला आएको छ” भन्ने टिप्पणी समेत गरिन्।
यस्तै, राष्ट्रिय सभामा बोल्दै नेकपाका सांसद विष्णुबहादुर विश्वकर्माले सरकारको “क्रूर व्यवहार” का कारण गणेश नेपालीले ज्यान गुमाउनुपरेको आरोप लगाए। आगोले जलेका व्यक्तिलाई पनि प्रहरीले अमानवीय व्यवहार गरेको दाबी गर्दै उनले नैतिकताको आधारमा प्रधानमन्त्री शाहले राजीनामा दिनुपर्ने माग गरे।
यसैबीच, माइतीघरमा प्रदर्शनमा उत्रिएका युवाहरूले राज्य संयन्त्र गरिब तथा श्रमजीवी वर्गप्रति संवेदनशील हुन नसकेको आरोप लगाएका छन्। अव्यवस्थित पार्किङ प्रणाली, चर्को जरिवाना तथा राइडरहरूको हकहितका लागि स्पष्ट नीति नहुँदा यस्ता दुःखद् घटना दोहोरिने अवस्था सिर्जना भएको उनीहरूको भनाइ छ।
प्रदर्शनकारीहरूले घटनाको निष्पक्ष छानबिन, दोषीमाथि कानुनी कारबाही तथा प्रधानमन्त्री बालेन शाहको राजीनामाको माग गरेका छन्। उनीहरूले राज्यको संवेदनहीनता र दमनकारी प्रवृत्तिका कारण गणेश नेपालीले ज्यान गुमाउनुपरेको आरोप लगाएका छन्।
