आफूले मन पराएको नेतृत्वले जे गरे पनि आँखामुन्देर सही ठान्ने प्रवृत्तिले देशलाई विकास होइन, बर्बादीतर्फ धकेलिरहेको छ

धनगढी- देश निर्माणका लागि सक्षम नेतृत्व चाहिन्छ , जसमा सचेत नागरिक र सही निर्णय अत्यन्त आवश्यक मानिन्छ। तर हाम्रो समाजमा एउटा खतरनाक प्रवृत्ति बढ्दै गएको छ । आफुले मन पराएको नेता वा नेतृत्वले जे गरे पनि सही हो भन्ने सोच। यही अन्ध समर्थन र पक्षपातपूर्ण मानसिकताले देशलाई कमजोर बनाइरहेको छ।
लोकतन्त्रमा नेता जनताका सेवक हुन्, मालिक होइनन्। जनताले उनीहरूलाई देश र जनताको हितका लागि जिम्मेवारी दिएका हुन्छन्। तर जब नागरिकहरू आफ्नो पार्टी, नेता वा समूहप्रति यति धेरै अन्धभक्त बन्छन् कि उनीहरूको गलत कामसमेत सही देख्न थाल्छन्, तब भ्रष्टाचार, बेथिति र अन्यायले प्रश्रय पाउँछ।
आज देशमा धेरै समस्या देखिन्छन् ,, भ्रष्टाचार, बेरोजगारी, विकासमा ढिलाइ, युवाको विदेश पलायन, कमजोर शिक्षा र स्वास्थ्य व्यवस्था। यी समस्याको एउटा मुख्य कारण नागरिकको मौन समर्थन पनि हो। कुनै नेता गलत कार्यमा मुछिँदा पनि “मेरो नेता हो” भनेर बचाउने, आलोचना गर्नेलाई शत्रु ठान्ने, र सत्यभन्दा पार्टीलाई माथि राख्ने प्रवृत्तिले देशलाई झन् कमजोर बनाएको छ।
असल नागरिक भनेको राम्रो कामको समर्थन गर्ने र गलत कामको विरोध गर्ने व्यक्ति हो। नेतृत्वप्रति समर्थन हुनु नराम्रो होइन, तर समर्थन विवेकपूर्ण हुनुपर्छ। यदि नेता गलत छन् भने आफ्नै पक्षका भए पनि सच्याउन सक्नुपर्छ। देश व्यक्ति वा पार्टीभन्दा ठूलो हुन्छ भन्ने चेतना सबैमा हुन जरुरी छ।
इतिहासले पनि देखाएको छ कि अन्धभक्तिले कहिल्यै देशलाई उन्नति गराएको छैन। जहाँ नागरिक सचेत हुन्छन्, त्यहाँ नेता पनि जिम्मेवार बन्छन्। तर जहाँ जनता विभाजित भएर केवल आफ्नो नेताको बचाउमा लाग्छन्, त्यहाँ विकासभन्दा झगडा र अस्थिरता बढ्छ।
अब समय आएको छ, व्यक्ति होइन, नीति हेर्ने,पार्टी होइन, देश सोच्ने। नेता होइन, सत्य र न्यायको पक्षमा उभिने। जबसम्म हामी “मेरो नेता जे गरे पनि सही” भन्ने मानसिकताबाट बाहिर निस्कँदैनौं, तबसम्म देशले सही दिशा पाउन गाह्रो हुन्छ।