धनगढी – कैलालीको कैलारी गाउँपालिका मोटरसाइकल दुर्घटनामा परि गम्भीर घाइते भएका प्रहरी जवान अनिल रावलको उपचारका लागि आर्थिक सहयोग गरिएको छ ।
बझाङको मष्टा गाउँपालिका–१ घर भएका रावलको उपचारका लागि विद्यार्थीहरूले आर्थिक सहयोग गरेका हुन् । गत चैत ११ गते ड्युटी सक्काएर घर फर्कने क्रममा भएको दुर्घटनापछि उनलाई निसर्ग हस्पिटलमा भेन्टिलेटरमा राखेर उपचार भइरहेको छ।
प्रहरी जवान पेशामा कार्यरत रावलको स्वास्थ्य अवस्था गम्भीर रहेको र उपचार खर्च करिब २० लाख रुपैयाँ नाघ्ने अनुमान गरिएको छ। आर्थिक अवस्था कमजोर भएका कारण परिवारलाई उपचार खर्च धान्न कठिन भएपछि सहयोगको अपिल गरिएको थियो।
सोही अपिलपछि दीपक जोशीको पहलमा देवराज, माधव, सुरेश, लक्ष्मण, उमेश र अनिशा लगायतका साथीहरूको सहयोगमा ऐश्वर्य बहुमुखी क्याम्पसमा अध्ययनरत विद्यार्थी तथा शिक्षकहरूबाट आर्थिक सहयोग संकलन गरिएको थियो। संकलित रकम १७ हजार २३५ रुपैयाँ परिवारलाई हस्तान्तरण गरिएको जनाइएको छ।
सहयोगीहरूले घाइते रावलको शीघ्र स्वास्थ्य लाभको कामना गरेका छन् भने सहयोग गर्ने सबै महानुभावप्रति हार्दिक धन्यवाद व्यक्त गरिएको छ।
Advertisement
