सन् २०२६ सुरु

धनगढी- ग्रेगोरियन पात्रोअनुसार आजदेखि इस्वी संवत्‌को नयाँ वर्ष सन् २०२६ सुरु भएको छ। येशु ख्रिस्टको जन्म वर्षदेखि पादरी ग्रेगोरीले सुरु गरेकाले यसलाई ग्रेगोरियन पात्रो भनिन्छ।
नयाँ वर्ष सन् २०२६ का अवसरमा यो पात्रोअनुसार चाडपर्व मान्नेहरूले आज एक–आपसमा शुभकामना आदान–प्रदान गर्दै मनाइरहेका छन्। ग्रेगोरियन पात्रो सौरमासको आधारमा मात्र निर्माण गरिएको मानिन्छ। त्यसै आधारमा आलोचकहरूले यो पात्रो पूर्ण रूपमा वैज्ञानिक नभएको टिप्पणी गर्ने गरेका छन्।
विभिन्न संवत्को अध्ययन तथा अनुसन्धानमा संलग्न डा. शास्त्रदत्त पन्तका अनुसार सौरमास र चन्द्रमासको समन्वयबाट वैदिककालदेखि सुरु भएको विक्रम संवत् जति वैज्ञानिक नभए पनि हाल इस्वी संवत्को प्रभाव विश्वव्यापी बन्दै गएको छ।
एक वर्ष ३६५ दिन ६ घण्टा ४९ मिनेट ६ सेकेन्डको हुने भए पनि दिनभन्दा साना घण्टा, मिनेट र सेकेन्डको एकाइले गणनामा असर पार्ने भएकाले सामान्यतया उल्लेख गरिँदैन। त्यसको व्यवस्थापनका लागि विक्रम संवत्को पात्रोमा तीन वर्षमा एकपटक अधिकमासको व्यवस्था गरिएको छ।
इस्वी संवत्को पात्रोमा ‘लिप इयर’ (Leap Year) को माध्यमबाट समय व्यवस्थापन गर्ने प्रयास गरिए पनि यस विषयमा पश्चिमा देशहरूबीच समेत पूर्ण मतैक्यता हुन नसकेको डा. पन्त बताउँछन्।
पछिल्लो समय नेपालमा पनि अङ्ग्रेजी नयाँ वर्ष उल्लासपूर्वक मनाउने चलन बढ्दै गएको छ। नयाँ वर्ष २०२६ का अवसरमा विदेशी पर्यटकको बढी उपस्थिति हुने काठमाडौँको ठमेल, बौद्ध तथा उपत्यका बाहिरका पोखरा, सौराहा लगायतका स्थानमा विभिन्न कार्यक्रम आयोजना गरी नयाँ वर्षको स्वागत भइरहेको छ।