कैलालीको कैलारी-१ मा रहेको दिपेन्द्र माविको ४९ औँ वार्षिकोत्सव सम्पन्न , उत्कृष्ट विद्यार्थी सम्मानित

कैलालीको कैलारी गाउँपालिका- १ मा रहेको दिपेन्द्र माध्यमिक विद्यालयको ४९ औं वार्षिकोत्सब कार्यक्रम सम्पन्न भएको छ । आइतबार एक समारोहबीच विद्यालयको को ४९ औं वार्षिकोत्सब कार्यक्रम सम्पन्न भएको हो ।
कार्यक्रममा गाउँपालिका अध्यक्ष राजसमझ चौधरी प्रमुख आतिथ्यमा भएको थियोे । उनले शिक्षा क्षेत्रमा सुधार ल्याउन गाउँपालिकाले निरन्तर प्रयास गरिरहेको र विद्यालयको व्यवस्थापनमा आवश्यक जिम्मेवारी पालिकाले लिने प्रतिबद्धता व्यक्त गरेका छन् । अध्यक्ष चौधरीले शिक्षा सुधारका लागि हरसम्भव प्रयास भइरहे पनि सोचेजस्तो प्रतिफल आउन नसकेको बताए।
कार्यक्रमका विशिष्ट अतिथि तथा गाउँपालिका उपाध्यक्ष भगवती कुमारी चौधरीले शिक्षामा सुधार ल्याउन शिक्षकको मात्र एकल प्रयास पर्याप्त नहुने भन्दै अभिभावकको भूमिका पनि उत्तिकै महत्वपूर्ण हुने बताइन्।
यस्तै, गाउँपालिका शिक्षा शाखा प्रमुख गणेशप्रसाद मिश्रले सामुदायिक विद्यालयमा गुणस्तरीय शिक्षा प्रदान गरिँदै आए पनि विद्यार्थी संख्या क्रमशः घट्दै गइरहेकोले शिक्षा क्षेत्रमा निराशा पैदा भएको जानकारी गराए।
विद्यालयका प्रधानाध्यापक विनोद भट्टराईले विद्यालयको वार्षिक आय–व्यय विवरण प्रस्तुत गरेका थिए । कार्यक्रममा अभिभावक संघका अध्यक्ष बिसराम चौधरी, विद्यार्थी सुनिल विक र अस्मिता चौधरीले आ–आफ्नो मन्तव्य राखेका थिए।
विद्यालय व्यवस्थापन समितिका अध्यक्ष वीरप्रसाद चौधरीको अध्यक्षतामा सम्पन्न कार्यक्रममा स्वागत मन्तव्य प्लस–टु संयोजक प्रेमराज पन्तले गरेका थिए भने कार्यक्रम सञ्चालन शिक्षिका पशुपति कुँवरले गरेकी थिइन्।
कार्यक्रममा शिक्षक रामसिंह भुल र सन्तोष चौधरीलाई सम्मान गरिएको थियो। साथै, गत वर्षको परीक्षामा उत्कृष्ट नतिजा ल्याउने विद्यार्थीहरूलाई सम्मान तथा पुरस्कार प्रदान गरिएको थियो।
वार्षिकोत्सवका अवसरमा विद्यार्थीहरूले विविध सांस्कृतिक नृत्य तथा प्रस्तुतिसमेत प्रस्तुत गरेका थिए।