बझाङ । भेटेरिनरी अस्पताल तथा पशुसेवा विज्ञ केन्द्र बझाङमा सवारी चालकका रूपमा कार्यरत तिलक बम्मले सत्यवादी माध्यमिक विद्यालय, भोपुरमा अनाथ विद्यार्थीहरूको सहयोगार्थ अक्षयकोष (कोष स्थापना) का लागि ५० हजार ५ सय ५५ रुपैयाँ सहयोग गर्नुभएको छ ।
विद्यालयको वार्षिक उत्सवको अवसर पारेर उहाँले उक्त रकम व्यक्तिगत तवरबाट विद्यालय व्यवस्थापन समितिलाई हस्तान्तरण गर्नुभएको हो । सो अवसरमा बोल्दै बम्मले अनाथ तथा आर्थिक रूपमा कमजोर विद्यार्थीहरूको शिक्षामा सहयोग पुर्याउने उद्देश्यले उक्त सहयोग गरेको बताउनुभयो ।
उहाँका अनुसार स्थापना गरिएको कोषबाट विद्यालयमा अध्ययनरत अनाथ विद्यार्थीहरूको शैक्षिक सामग्री, पोशाक तथा अन्य आवश्यकतामा सहयोग पुर्याइनेछ । साथै उहाँले शिक्षाको पहुँचबाट कोही पनि वञ्चित हुन नपरोस् भन्ने भावना राख्दै सम्पूर्ण बझाङबासीलाई आ–आफ्नो क्षमताअनुसार अनाथ विद्यार्थीहरूको सहयोगमा हातेमालो गर्न अपिल गर्नुभएको छ ।
विद्यालय परिवारले तिलक बम्मको योगदानलाई उदाहरणीय र प्रेरणादायी भन्दै धन्यवाद व्यक्त गरेको छ । यस्ता सहयोगले समाजमा सकारात्मक सन्देश फैलिनुका साथै विद्यार्थीहरूको भविष्य उज्यालो बनाउन महत्वपूर्ण भूमिका खेल्ने विद्यालयको भनाइ छ ।
