देउलेख- बझाङको बित्थडचिर गाउँपालिका- ४ तोल्यानमा चोरी गर्ने क्रममा एक युवकलाई स्थानीयले नियन्त्रणमा लिएका छन्। गएराति करिब साढे २ बजेको समयमा पसल तथा एक घरमा चोरी गर्न लागेका बैतडीको मेलौली नगरपालिका–७ निवासी २२ वर्षीय महेश दयाललाई स्थानीयले नियन्त्रणमा लिएका हुन्।
स्थानीयका अनुसार दयालले राति सबै सुतेको मौका पारेर तोल्यानस्थित तीनवटा पसल र एक घरमा चोरी गर्न थालेका थिए। उनले एनडी किराना तथा नास्ता पसल, एलबि किराना एण्ड मदिरा पसल, बोहरा किराना पसल र रमिला बिकको घरमा चोरी गरेको बताइएको छ।
चोरी भइरहेको थाहा पाएपछि व्यापारी राजेश बहादुर बोहराले तत्काल स्थानीयलाई जानकारी गराएका थिए। त्यसपछि दयाललाई धनबहादुर बोहराको पसलमा चोरी गर्ने क्रममा स्थानीयको रोहबरमा नियन्त्रणमा लिई प्रहरीलाई खबर गरिएको थियो।
नियन्त्रणमा परेका दयाललाई हाल प्रहरी बेस देउलेखमा राखिएको छ भने आवश्यक अनुसन्धानपछि जिल्ला पठाउने तयारी भइरहेको प्रहरीले जनाएको छ। चोरीका क्रममा पसलका ताला, दराज र घरका घर्ला तोडफोड गरिएको पाइएको छ।
स्थानीयले चोरीमा दयालसँग अन्य व्यक्ति पनि संलग्न रहेको र उनीहरू भागेको बताएका छन्। दयालको साथबाट चोरीका नगद पैसा, गरगहना तथा मोबाइल फोन, चोरि गर्न प्रयोग हुने सामाग्री बरामद गरिएको प्रहरीले जनाएको छ।
घटनाबारे थप अनुसन्धान भइरहेको प्रहरीले जानकारी दिएको छ।
Advertisement
