बझाङ- बझाङको बित्थडचिर गाउँपालिकाकी पूर्व कार्यपालिका सदस्य कल्पना बोहरा (कलमती) को भीरबाट लडेर मृत्यु भएको छ ।
बित्थडचिर गाउँपालिका-१ खुल्मौर भैंसीगौड घर भएकी ३५ वर्षीय बोहराको बिहिवार बिहान खर काट्ने क्रममा भीरबाट लडेर मृत्यु भएको हो ।
गाई बस्तुका लागि खर (गाजो) काट्नका लागि बिहानै बैतडीको सिगास गाउँपालिका-९ च्वागड गौर्खा गएकी बोहरा भीरबाट लडेकी थिइन् । भीरबाट डेढ सय मिटर तल खसेकी बोहराको उद्धारका क्रममा बाटोमै मृत्यु भएको वडाध्यक्ष मानबहादुर बोहराले जानकारी दिए ।
भीरबाट लडेर मृत्यु भएकी बोहराको आजै अन्तिम दाहसंस्कार गरिएको छ ।
२०७४ सालमा भएको स्थानीय तह निर्वाचनमा बोहरा नेकपा एमालेबाट वडा सदस्य पदमा निर्वाचित भएकी थिइन् ।
बोहराको घरमा श्रीमान सासु ससुरा रहेका छन् ।
सुदूरपश्चिम वर्षेनी घाँस तथा खर काट्ने क्रममा नागरिकले ज्यान गुमाउँदै आएका छन् । स्थानीयले जोखिमयुक्त भीर र भिरालो जमिनमा काम गर्नुपरेकाले यस्तो दुर्घटना दोहोरिने गरेको बताए।
