बझाङ- बझाङको केदारस्यूँ गाउँपालिका–६, भाडसैंनस्थित प्रस्तावित बाहृदेब क्याम्पसले सुदूरपश्चिम विश्वविद्यालयबाट नयाँ सम्बन्धन प्राप्त गरेको छ। भदौ १२ गते प्रस्तावित बाहृदेब क्याम्पसले सुदूरपश्चिम विश्वविद्यालयबाट सम्बन्धन प्राप्त गरेको हो । यससँगै स्थानीय जनसमुदायमा ठूलो खुशी छाएको छ।
पालिकाको माथिल्लो भूभागका विद्यार्थीलाई घरआगनमै उच्च शिक्षा प्रदान गर्न क्याम्पस सञ्चालनमा ल्याउन लागिएको छ । उक्त क्षेत्रमा १२ कक्षासम्म अध्ययनका लागि विद्यालय भए पनि स्नातक तहको अध्ययन गर्नका लागि नजिकै क्याम्पसको सुविधा नहुँदा वडा नम्बर ५, ६, ७ , ८ र दुर्गाथलि गाउँपालिका-६ का विद्यार्थीलाई टाढासम्म धाउनुपर्ने बाध्यता थियो। सम्बन्धन प्राप्त भएपछि ती विद्यार्थीलाई आफ्नै क्षेत्रमा बस्दै उच्चशिक्षा अध्ययन गर्ने अवसर उपलब्ध हुने भएको छ।
केदारस्यूँ गाउँपालिकाका अध्यक्ष गणेश बहादुर बोहराले यो उपलब्धि गाउँपालिकाको साझा गर्व भएको उल्लेख गर्दै सम्पूर्ण क्याम्पस परिवारलाई बधाई ज्ञापन गरेका छन्। साथै, सम्बन्धन प्रक्रियामा प्रत्यक्ष–अप्रत्यक्ष रूपमा सहयोग गर्ने विश्वविद्यालयका पदाधिकारी, जनप्रतिनिधि, शिक्षा क्षेत्रमा सक्रिय व्यक्तित्व, चन्द्रोदय माध्यमिक विद्यालय परिवार, विद्यार्थी, अभिभावक तथा समुदायका अग्रजप्रति आभार प्रकट गरेका छन्।
अध्यक्ष बोहराले भने, “अबको यात्रा अझ चुनौतीपूर्ण छ। क्याम्पस सञ्चालनका लागि गुणस्तरीय शिक्षा, स्रोत–साधनको परिचालन, दक्ष जनशक्तिको व्यवस्थापन र यसलाई आदर्श शिक्षण केन्द्रका रूपमा विकास गर्न सबै सरोकारवालाको सक्रियता आवश्यक छ।”
उनले गाउँपालिका सदैव क्याम्पससँग खडा रहने प्रतिवद्धता व्यक्त गर्दै समुदाय, शुभेच्छुक र सम्पूर्ण नागरिकसँग निरन्तर सहयोग, सुझाव र सहकार्यको अपेक्षा पनि व्यक्त गरेका छन्।
तत्काल चन्द्रोदय माविको भवनमा पठनपाठन हुने,
सुदूरपश्चिम विश्वविद्यालयबाट नयाँ सम्बन्धन प्राप्त गरेको बाहृदेब क्याम्पस सञ्चालन तथा विद्यार्थी भर्नाका लागि बैठक बस्दै छ । यहीँ भदौ १७ गते मंगलबार के कसरी क्याम्पस सञ्चालन गर्ने तथा विद्यार्थी भर्नाका विषयमा छलफल गर्न बैठक बस्न लागेको चन्द्रोदय माध्यमिक विद्यालयका प्रधानाध्यापक जनक बहादुर धामीले जानकारी दिए। उनलेे भने तत्काल यहीँ शैक्षिकसत्रबाट विद्यार्थी भर्ना गरेर पठनपाठन गर्ने तयारी छ । क्याम्पसको भवन नभएसम्म तत्काल विद्यालयको भवनमै पठनपाठन गर्ने तयारी थालिएको समेत धामीको भनाइ छ ।
