धनगढी- कैलाली कारागारमा भएको झडपपछि घाइते कैदीबन्दीलाई मागअनुसार अन्य कारागारमा स्थानान्तरण गरी व्यवस्थापन गर्ने काम भइरहेको छ ।
अस्पतालबाट उपचार गरेर फर्किएका कैदीबन्दीलाई स्वास्थ्यलाभका लागि थप समय आवश्यक भएकाले तत्काल रोजेको कारागारमा पठाउने व्यवस्था गरिएको हो । हालसम्म अस्पतालबाट फर्किएका मध्ये ६ जनालाई कञ्चनपुर र डडेल्धुरा कारागारमा पठाइसकिएको जिल्ला प्रशासन कार्यालयले जनाएको छ।।
गत साउन २३ गते राति कैदीबन्दीबीच भएको झडपमा एक जनाको मृत्यु भएको थियो भने ४९ जना घाइते भएका थिए। तीमध्ये गम्भीर घाइते कर्ण सलामी मगर, कल्पेस विष्ट र आयुस भट्टको काठमाडौँमा उपचार भइरहेको छ। सेती प्रादेशिक अस्पतालमा उपचाररतमध्ये नौ जनाबाहेक सबै डिस्चार्ज भइसकेका छन्।
घटनाको छानबिनका लागि सहायक प्रमुख जिल्ला अधिकारी किरण जोशीको संयोजकत्वमा समिति गठन गरिएको छ भने प्रहरीले अनुसन्धान अघि बढाइरहेको जनाएको छ।
यसैबीच, सुदूरपश्चिम प्रदेश सरकारले घटनामा ज्यान गुमाएका कैदी मदन चौधरीका परिवारलाई पाँच लाख रुपैयाँ सहयोग गर्ने निर्णय गरेको छ। घटनापछि सरकारले कैलालीका प्रमुख जिल्ला अधिकारी गोगनबहादुर हमाललाई फिर्ता गरी कृष्णप्रसाद लम्साललाई जिम्मेवारी तोकेको छ।
