काठमाडौँ- नेपालमा फेरि केही दिनका लागि मनसुन सक्रिय हुने भएको छ। यसपटक विशेषगरी तराईसहितका विभिन्न क्षेत्रमा वर्षा हुने मौसमविद्हरूले बताएका छन्।
जल तथा मौसम विज्ञान विभागको मौसम पूर्वानुमान महाशाखाकी मौसमविद् शान्ति कँडेलका अनुसार तराई क्षेत्रका केही स्थानमा भारी वर्षा हुनसक्छ। बागमती, गण्डकी र कर्णाली प्रदेशमा औसतभन्दा केही कम, तर अन्य प्रदेशहरूमा बढी वर्षाको सम्भावना छ। यद्यपि, देशभर नै मौसम बदली हुने देखिएको छ।
हाल नेपालभर मनसुनी वायु सक्रिय रहेको र मनसुनको न्यून चापीय रेखा सामान्य स्थानको केही उत्तरतिर रहेको जनाइएको छ। कोशी र बागमती प्रदेशका थोरै स्थानहरूमा हल्कादेखि मध्यम वर्षा भइरहेको छ।
महाशाखाले आगामी केही दिन देशभर मनसुन थप सक्रिय हुने भएकाले सर्वसाधारण र सरोकारवाला निकायहरूलाई सावधानी अपनाउन तथा पछिल्लो मौसमी जानकारी निरन्तर प्राप्त गर्न अनुरोध गरेको छ।
