बझाङ- चरेस प्रकरण मिलाइदिने भन्दै बझाङको बुङ्गल नगरपालिकाका मेयर जयबहादुर धामीले एक लाख रुपैयाँ घुस लिएको आरोप लागेको छ।
स्थानीय गोपाल धामीले सार्वजनिक गरेका विवरण अनुसार, झण्डै एक वर्षअघि चरेससहित प्रहरीले नियन्त्रणमा लिएको गाडीको मुद्दा मिलाइदिने भन्दै मेयर धामीले पैसा लिएको दाबी गरेका छन्। गोपाल धामीका अनुसार, मुद्दा मिलाउने नाममा मागिएको पैसा मेयरको खातामा पठाइएको थियो, तर न मुद्दा मिल्यो, न त अन्य कुनै सहजीकरण भयो।
फेसबुकमा प्रमाणसहितको खुलासा
गोपाल धामीले आफ्नो सामाजिक सञ्जालमार्फत पैसा पठाएको भनी स्क्रिनसटसहितको पोस्ट सार्वजनिक गरेका छन्। उक्त पोस्टमा उनले मेयर धामीले आफूलाई ढाँटेको, घुस लिएर पनि काम नगरेको बताएका छन्। सामाजिक सञ्जालमा विवाद चुलिएपछि मेयर धामीले पैसा फिर्ता गर्ने बताएका छन्।
“लिएको हुँ, तर फिर्ता गर्छु”: मेयरको भनाइ
टेलिफोन संवादमा मेयर जयबहादुर धामीले पैसा आफूले लिएको स्वीकार गर्दै भने, “लिएको त हो, तर अब फिर्ता गर्छु। गल्ती भयो। अब यस्ता काम नगर्नेछु।” यद्यपि, उनले यो रकम घुस नभई ऋणका रूपमा लिएको दाबी गरेका छन्।
तर प्राप्त गोप्य स्रोतका अनुसार, गोपाल धामीले मेयर धामीको ०८२३१०१६७१६३८०१४ नम्बरको खातामा रकम पठाएर, त्यो रकम ०८२६५०२१८८१५१०११ नम्बर खाताबाट ट्रान्सफर गरिएको पुष्टि भएको छ। रकम २०२४ अगस्ट २९ मा ५:५५ बजे मोबाइलमार्फत ट्रान्सफर गरिएको देखिन्छ। ट्रान्सफर कोड ११८९३९३९ रहेको छ।
चरेस जस्तो जटिल मुद्दा मिलाउने अधिकार एक नगरप्रमुखलाई कसरी र किन दिइयो भन्ने प्रश्न उठेको छ। कानुनी रूपमा यस्तो कार्य न्यायलय, प्रशासन र अनुसन्धान निकायको क्षेत्राधिकारभित्र पर्छ।
स्थानीयहरू र कानुनी विज्ञहरूले सोधेका छन्, “यदि मेयरले पैसा लिएका हुन् भने यो स्पष्ट घुसको परिभाषाभित्र पर्छ। यस्तो कार्यमा संलग्नलाई कानुनी कठघरामा ल्याउनु आवश्यक छ।”
