बझाङको साइपाल गाउँपालिका वडा नं. १ मा बहुक्षेत्रीय पोषण कार्यक्रमअन्तर्गत सुनौला हजार दिनका आमाहरू तथा २ वर्षमुनिका बालबालिका भएकी ४१ जना महिला लाभग्राहीलाई बाख्रा वितरण गरिएको छ । पोषण सुधारसँगै आयआर्जनमा सहयोग पुगोस् भन्ने उद्देश्यले लक्षित महिलाहरूलाई कार्यक्रममार्फत बाख्रा प्रदान गरिएको हो ।
कार्यक्रमले लक्षित समुहका आमाहरूको पोषण अवस्था सुधार गर्नुका साथै पशुपालनबाट आम्दानी आर्जन गरी आत्मनिर्भर बन्न सहयोग पुग्ने विश्वास लिइएको छ । बाख्रा पालनले महिलाहरूको आर्थिक सशक्तिकरणमा टेवा पुग्ने र परिवारको समग्र स्वास्थ्यमा सुधार ल्याउने अपेक्षा गरिएको छ ।
वडा अध्यक्ष तथा गाउँपालिका प्रवक्ता नरेन्द्र धामीले कार्यक्रमबारे जानकारी दिँदै भने, सुनौला हजार दिनको अवधिमा आमाहरूको पोषण अवस्था सुधार गर्नु हाम्रो पहिलो लक्ष्य हो। आयआर्जनका साथ पोषणमा सुधार ल्याउने यो कार्यक्रमको प्रभाव केही महिनामै देखिनेछ । साथै, उनले कार्यक्रम सफल बनाउन सहयोग गर्ने सबै सरोकारवालाप्रति धन्यवाद व्यक्त गरे ।
कार्यक्रम सञ्चालनमा सक्रिय भूमिका निर्वाह गरेकी पोषण सहजकर्ता सुनिता बोहराले महिलाहरूलाई बाख्राको हेरचाह, पोषणयुक्त आहार व्यवस्थापन, रोग नियन्त्रणलगायत विषयमा व्यवहारिक तालिम दिइएको जानकारी दिइन् । सुनौला हजार दिन अत्यन्त संवेदनशील समय हो । यस अवधिमा आमाको पोषण सुधार गर्न बाख्राबाट दुग्धजन्य पदार्थको पहुँच बढ्ने विश्वास लिएको छ, बोहराले भनिन्।
बाख्रा वितरणसँगै सहभागी महिलाहरूलाई पशुपालनसम्बन्धी आधारभूत तालिम प्रदान गरिएको थियो । तालिमपछि महिलाहरूमा आत्मविश्वास बढेको र बाख्रालाई राम्रोसँग हेरचाह गर्न सक्ने विश्वास देखिएको वडा कार्यालयले जनाएको छ ।
कार्यक्रममा सहभागी लाभग्राही महिलाहरूले बाख्राबाट प्राप्त हुने फाइदाले परिवारको पोषणस्तरमा सकारात्मक प्रभाव पार्ने र सन्तानको स्वास्थ्यमा सुधार ल्याउने प्रतिक्रिया दिएका छन् ।
पछिल्लो समय वडा अध्यक्ष तथा गाउँपालिका प्रवक्ता युवा नेता नरेन्द्र धामीको सामाजिक कार्यमा सक्रियता बढ्दै गएको छ । विकास, जनस्वास्थ्य, शिक्षा र पोषणजस्ता क्षेत्रमा देखिएको उनको पहललाई साइपालवासी जनताले खुलेर प्रशंसा गर्दै आएका छन् ।
