काठमाडौँ– देशभर हाल मनसुनी वायुको सक्रिय प्रभाव रहेको मौसम पूर्वानुमान महाशाखाले जानकारी दिएको छ। मनसुनको प्रभावसँगै देशका अधिकांश भूभागमा बादल लाग्ने, वर्षा हुने, र बाढीपहिरोको जोखिम बढ्ने सम्भावना रहेको छ।
महाशाखाका अनुसार हाल गण्डकी, लुम्बिनी, कर्णाली र सुदूरपश्चिम प्रदेशमा धेरै भारी वर्षाको सम्भावना छ। यस्ता क्षेत्रमा नदीहरूको जल सतह बढ्न सक्ने भएकाले सतर्क रहनु आवश्यक रहेको उल्लेख गरिएको छ।
आज आइतबार दिउँसो देशभर आंशिकदेखि पूर्णतया बदली रहने छ। विशेष गरी गण्डकी, लुम्बिनी, कर्णाली र सुदूरपश्चिम प्रदेशका धेरै स्थानहरूमा चट्याङसहित हल्कादेखि मध्यम वर्षाको सम्भावना छ। बाँकी पहाडी भूभागमा पनि कतिपय स्थानमा वर्षा हुन सक्ने अनुमान गरिएको छ।
यस्तै, ती चार प्रदेशका केही स्थानहरूमा भारीदेखि धेरै भारी वर्षा हुने सम्भावना रहेकोले जलमग्नता, साना नदीमा आकस्मिक बाढी तथा पहिरोको जोखिम समेत रहेको महाशाखाले जनाएको छ।
साथै, देशका उच्च पहाडी र हिमाली भूभागमा पनि केही स्थानमा हल्का देखि मध्यम वर्षासहित हिमपात हुने सम्भावना रहेको छ।
महाशाखाले बाढीपहिरो र सम्भावित जोखिमको पूर्वानुमानका आधारमा स्थानीयवासी, यात्रा गर्नेहरू तथा निर्माणमा संलग्न पक्षहरूलाई सतर्कता अपनाउन आग्रह गरेको छ।
