काठमाण्डौ- हाल कोशी प्रदेशका केही स्थानमा हल्कादेखि मध्यम वर्षा भइरहेको छ भने मधेस र बागमती प्रदेशमा आंशिक बदलीको अवस्था रहेको जल तथा मौसम पूर्वानुमान महाशाखाले जनाएको छ।
महाशाखाका मौसमविद् सञ्जीव अधिकारीका अनुसार गएराति खोटाङ, चितवन, म्याग्दी, दाङ र सिन्धुपाल्चोकमा ठूलो वर्षा भएको थियो। तराईका अधिकांश भूभागमा गएराति वर्षा कम भए पनि आज ती क्षेत्रमा भारी वर्षाको सम्भावना रहेको अधिकारीले जानकारी दिनुभयो।
यसैबीच, बाढी पूर्वानुमान महाशाखाले खोटाङ, दोलखा र चितवन जिल्लाका स–साना खोलानाला तथा तिनका आसपास क्षेत्रहरूमा पानीको बहाव बढ्न सक्ने भन्दै सतर्क रहन आग्रह गरेको छ।
विशेषगरी दोलखाको खिम्ती खोला, चितवनको काली खोला लगायतका अन्य साना नदीहरूमा बाढी र पहिरोको जोखिम रहेकोले स्थानीयवासीलाई आवश्यक सावधानी अपनाउन महाशाखाले अनुरोध गरेको छ।
