धनगडि—राष्ट्रिय स्वतन्त्र पार्टी (रास्वपा) सुदूरपश्चिम प्रदेश सभापति प्रकाश विष्टलाई कारबाहीको सिफारिस गरिएको छ
तत्कालीन सहमहामन्त्री एवं सांसद सुमना श्रेष्ठ र पार्टीबाट निष्कासित पूर्वमहामन्त्री मुकुल ढकालसँग मिलेर पार्टी चलाएको आरोपमा विष्टलाई प्रदेशका ९ जिल्ला सभापतिले कारबाहीको सिफारिस गरेका हुन् ।उनीमाथि विधानविपरीत पदाधिकारी मनोनीत गरेको, फरक मत राख्नेलाई पदबाट हटाउने, अधिवेशनकेन्द्रित राजनीति गर्ने, पार्टीभित्र गुटबन्दी गर्ने, प्रदेश पदाधिकारी मनपरी तरिकाले नियुक्त गर्ने/हटाउने, प्रदेश समिति बैठकका नक्कली कागजात तयार गरी कागजजी प्रमाण तयार गर्ने, पटक-पटक पार्टी नेतृत्वलाई धोका दिएको लगायतका ११ बुँदे आरोप छ । विष्टमाथि कारबाही प्रक्रिया अघि बढाउन प्रदेश इन्चार्ज एवं सांसद हरि ढकाललाई निवेदनसमेत दिइएको छ ।
सुदूरपश्चिमबाट दिपक बोहरा (डडेलधुरा) , विजय जैरु (कञ्चनपुर) र प्रतिभा रावल (अछाम) गरी तीन जना रास्वपाको केन्द्रीय समितिमा छन् । उनीहरु तीनै जना रवि लामिछाने निकट मानिन्छन् । स्रोतका अनुसार प्रदेश सभापति विष्टले लामिछाने निकटका मान्छेलाई पेल्ने र केन्द्रीय नेतालाई अटेर गर्ने अरोपसमेत लगाइएको छ । ‘प्रदेश सभापतिले सुमना श्रेष्ठ र मुकुल ढकालको इशारामा पार्टी चलाएको देखियो । लामिछाने निकटका केन्द्रीय नेता सुदूरपश्चिममा आउँदा उहाँले फोन नउठाउने, नटेर्ने गरेको धेरै पहिलेदेखि हो,’ स्रोत भन्छ,‘सुमना श्रेष्ठ पछिल्लो समयमा आफ्नो गुट बनाउन लागेको पनि देखिन्छ । लामिछानेबाहेकलाई मान्नेको राजनीति सकिन्छ । प्रदेश सभापति त्यसैको निशानामा पर्नुभयो ।’
काठमाडौं गएको बेला मुकुल ढकाललाई भेट्ने र सुमनालाई नेता मान्ने गरेको आरोपमा उनलाई पार्टीबाटै निकाल्नेसम्मको रणनीति अपाइएको छ । ‘सुमनाको नजिकका मान्छेलाई कारबाही गर्न सके उनी बलियो हुन सक्दैन भन्नेमा लामिछाने निकटकालाई परेको छ । केन्द्रीय सदस्य विजय जैरुको नेतृत्वमा सबै जिल्लाका सभापतिलाई हस्ताक्षर गर्न लगाएर निवेदन दिइएको छ,’ स्रोत भन्छ,‘विष्टलाई हटाउनका लागि लेखिएको निवेदनमा अछाम र बझाङका जिल्ला सभापतिहरु हस्ताक्षर गर्न तयार थिएनन् । उनीहरुलाई दबाबमा ल्याइएको हो । ’
पार्टीभित्र राम्रा मान्छेभन्दा आफू निकटका मान्छेलाई संरक्षण गर्ने प्रवृत्तिको निसानामा आफू पनि परेको रास्वपा प्रदेश सभापति विष्टले बताए । ‘मेरो कामको समीक्षा प्रदेश समितिले गर्नु पर्ने हो । माथिको आड लिएर तलको राजनीति गर्ने प्रवृत्ति छ । राम्रा मान्छेभन्दा हाम्रा मान्छेलाई संरक्षण गर्ने प्रवृत्ति राजनीतिमा देखिन्छ । यसमा हाम्रो पार्टी पनि अछूत रहेन ।’
प्रदेश समितिमा निर्णय गर्दा विधिविधानमा रहेर नै गरेको उनको दाबी छ । ‘मैले हरेक निर्णय विधिविधानमा टेकेर गरेको छु । म पनि मास्टर्स गरेको इन्जिनियर हुँ । देश, विदेशमा पाएका धेरै अवसर छोडेर फुलटाइम पार्टीलाई दिएको छु’, उनले भने,‘ कोशीको सभापति यस अगाडि नेतृत्वको सिकार भइसकेका छन् । अब मेरो पालो होला । पार्टीबाट निकालिहाले पनि मलाई केही चिन्ता छैन । मैले गर्नु पर्ने धेरै काम बाँकी छन् । आफ्नो काम गरेर बस्छु ।
