मङ्गलसेन, अछाम : नेकपा (एमाले) अछामको बहुप्रतीक्षित ९औं जिल्ला अधिवेशन वैशाख १३ देखि १५ गतेसम्म मङ्गलसेनमा हुने भएको छ। सुदूरपश्चिम प्रदेशका अन्य ८ जिल्लामा अधिवेशन सम्पन्न भइसकेको भए पनि पार्टी केन्द्रमा देखिएको विवादका कारण अछाममा अधिवेशन ढिला भएको हो।
अधिवेशन नजिकिएसँगै नेताहरू विभिन्न पदका लागि आफ्नो उम्मेदवारी घोषणा गर्न थालेका छन्। एमाले अछामको अध्यक्ष पदमा हालसम्म ७ जना आकांक्षी देखिएका छन् भने सचिव र उपसचिव पदका लागि समेत उल्लेख्य संख्यामा आकांक्षीहरू छन्।
यही क्रममा, एमालेका युवा नेता सिद्ध प्रसाद ढुंगानाले उपसचिव पदमा आफ्नो सशक्त दाबी प्रस्तुत गरेका छन्। पछिल्लो अधिवेशनमा लोकप्रिय मतका साथ जिल्ला कमिटी सदस्यमा निर्वाचित भएका ढुंगानाले यसपटक उपसचिवको जिम्मेवारी सम्हाल्न सक्ने विश्वास व्यक्त गरेका छन्। “सहमतिको माध्यमबाट नेतृत्व चयन भए पनि म उपसचिव पदका लागि योग्य छु,” ढुंगानाले भने, “निर्वाचन होस् वा सहमति, म मेरो अडानबाट पछि हट्दिन।” उनले कामना टुडे लाई जानकारि दिय ।
राजनीतिक यात्रा र संगठनभित्रको योगदान
सिद्ध प्रसाद ढुंगानाले २०६४ सालमा अनेरास्ववियु, श्री षोडशा मावि मङ्गलसेनको प्रारम्भिक कमिटी सदस्यबाट आफ्नो राजनीतिक यात्रा सुरु गरेका थिए। दुई वर्षमै उनी सचिव बन्न सफल भए। त्यसपछि शैक्षिक यात्राको क्रममा धनगढीस्थित शैलेश्वरी फारबेस्ट स्कूल अफ हेल्थ साइन्समा काउन्सिल सदस्य हुँदै सभापति बने।
२०७० मा अनेरास्ववियु अछाम जिल्ला कमिटी सदस्य, २०७७ मा केन्द्रिय कमिटी सदस्य हुँदै संगठनभित्र उनले मजबुत उपस्थिति जनाए। हाल उनी राष्ट्रिय स्वास्थ्यकर्मी महासंघ नेपालका केन्द्रीय सचिव तथा सुदूरपश्चिम प्रदेश इन्चार्जको जिम्मेवारीमा छन्।
सामाजिक क्षेत्र र जनसमस्यामा सक्रियता
राजनीतिक नेतृत्वसँगै ढुंगाना सामाजिक क्षेत्रमा समेत क्रियाशील छन्। अछाम जिल्ला अस्पताल निर्माण, बयलपाटा अस्पतालको दीगो व्यवस्थापन, ऐतिहासिक मंगलसेन दरबारको पुनर्निर्माण तथा प्रादेशिक संग्रहालय बनाउने पहल, बहुप्राविधिक शिक्षालयमा नयाँ कार्यक्रम स्थापनालगायत विषयमा उनी निर्णायक भुमिकामा देखिए।
त्यसैगरी, कमलबजार नगरपालिका अस्पतालको सुधारका लागि उनले संघीय संसदको शिक्षा, स्वास्थ्य तथा सूचना प्रविधि समितिमा विषय उठाए। बंगलादेश सरकारबाट प्राप्त छात्रवृत्तिमा देखिएको अनियमितता र अछामका लागि उपलब्ध अनुदान चामल वितरणमा देखिएको अव्यवस्थाविरुद्ध पनि उनी निरन्तर खबरदारी गर्दै आएका छन्।
सादा जीवनशैली र कार्यकर्तामैत्री व्यवहार
सादा जीवनशैली, स्पष्ट राजनीतिक विचार, नीतिगत प्रतिबद्धता र कार्यकर्तामैत्री व्यवहार ढुंगानाको पहिचान बनेको छ। कार्यकर्ताहरूका अनुसार, ढुंगानाको नेतृत्व क्षमताले पार्टीको भविष्यलाई नयाँ दिशा दिनेछ। एक स्थानीय कार्यकर्ताले भनेका छन्, “ढुंगाना जस्तो नेतृत्वले पार्टी र जनताको बीचमा सेतुको काम गर्नेछ।”
