बझाङ — जिल्लामा जडीबुटीको महत्व, त्यसको प्रयोग र समग्र रूपमा स्वस्थ जीवनशैलीबारे जनचेतना फैलाउने उद्देश्यले एक दिवसीय परामर्श कार्यक्रम सम्पन्न भएको छ। जिल्ला आयुर्वेदिक स्वास्थ्य केन्द्र बझाङको आयोजनामा सम्पन्न उक्त कार्यक्रममा स्थानीय तहका प्रतिनिधि र सर्वसाधारणलाई आयुर्वेदिक ज्ञान तथा व्यवहारमा आधारित जीवनशैलीबारे महत्वपूर्ण जानकारी प्रदान गरिएको थियो।
कार्यक्रम जिल्ला आयुर्वेदिक स्वास्थ्य केन्द्र बझाङका प्रमुख मिनराज पुरीको अध्यक्षतामा सम्पन्न भएको हो। प्रमुख अतिथि जिल्ला समन्वय समितिका प्रमुख नरबहादुर बोहराले परम्परागत जडीबुटी र आयुर्वेद विज्ञानको संरक्षण तथा प्रवर्द्धनमा यस्ता कार्यक्रमहरूले सघाउ पुर्याउने विश्वास व्यक्त गरे।
परामर्श तथा प्रशिक्षण सत्रमा देउलेख आयुर्वेदिक स्वास्थ्य केन्द्रका इन्चार्ज डा. हिमाल भट्ट र मोहन मल्लले सहजीकरण गरेका थिए। उनीहरूले नेपालको पहाडी भेगमा पाइने बहुमूल्य जडीबुटीहरू, तीका औषधीय गुणहरू र घरमै अपनाउन सकिने आयुर्वेदिक उपायबारे विस्तृत जानकारी दिएका थिए।
कार्यक्रमको सुरुआतमा आयुर्वेदिक स्वास्थ्य केन्द्र बझाङका कर्मचारी प्रकाश बिष्टले स्वागत मन्तव्य राख्दै सहभागीहरूलाई कार्यक्रमको उद्देश्य र महत्वबारे अवगत गराएका थिए।
सक्रिय सहभागितासहित सम्पन्न कार्यक्रममा बझाङका १२ वटै स्थानीय तहबाट करिब ८० जना प्रतिनिधिहरू सहभागी भएका थिए। अन्य सरोकारवालासमेत गरी कुल ९२ जनाको उपस्थिति रहेको थियो। सहभागीहरूले कार्यक्रम निकै उपयोगी र जानकारीमूलक रहेको प्रतिक्रिया दिएका छन्।
कार्यक्रमको समापनमा आयोजकले आगामी दिनमा यस्ता जनमुखी कार्यक्रमलाई अझ व्यापक बनाउँदै लैजाने प्रतिबद्धता व्यक्त गरेका थिए।
