धनगढी- कैलालीको कैलारी गाउँपालिका–५, बैजपुरमा निर्माण भएको १५ शय्याको अस्पताल बजेट अभावका कारण सञ्चालनमा आउन सकेको छैन। संघीय सरकारको नीति अनुसार भव्य भवन तयार भए पनि जनशक्ति, उपकरण र व्यवस्थापनका लागि आवश्यक बजेट नहुँदा अस्पताल सञ्चालनमा समस्या भएको हो।
गाउँपालिकाका सूचना अधिकारी यगम कलेलका अनुसार, अस्पतालको संरचना निर्माण सम्पन्न भए पनि सञ्चालनका लागि बजेट नहुँदा चुनौती बढेको छ। नेपाल सरकारको नीति अनुसार सबै पालिकामा १५ शय्याको अस्पताल बनाउने योजनाअन्तर्गत २०७० असार २९ गते सम्झौता गरी निर्माण सुरु गरिएको थियो।
१८ करोड ५२ लाख रुपैयाँ लागतमा रोयल कन्स्ट्रक्सन जेभीले अस्पताल भवन निर्माण गरेको हो। तर गाउँपालिकाले अझै तीन करोड चार लाख रुपैयाँ भुक्तानी गर्न नसकेको हुँदा निर्माण कम्पनीले अस्पताल हस्तान्तरण गरेको छैन।
स्वास्थ्य शाखा प्रमुख नरेश चौधरीका अनुसार, भवन तयार भइसक्दा पनि बजेटको पर्खाइमा अस्पताल थन्किएको छ। विशेषज्ञ सेवासहित अस्पताल सञ्चालन गर्न वार्षिक कम्तीमा पाँच करोड रुपैयाँ आवश्यक पर्ने उहाँको भनाइ छ।
अस्पताल सञ्चालन भएमा गाउँमै गुणस्तरीय स्वास्थ्य सेवा पाउनेमा स्थानीय आशावादी छन्। स्थानीयवासीहरूले विद्यालय हटाएर बनाइएको यो अस्पताल चाँडै सञ्चालन गर्न माग गरिरहेका छन्। कोरोना महामारीका बेला कोभिड अस्पतालको रूपमा प्रयोग भएको उक्त भवनमै अहिले १५ शय्याको अस्पताल निर्माण गरिएको हो।
