टीकापुर — कैलालीको टीकापुर नगरपालिकाले शैक्षिक वर्ष २०८२ देखि अनाथ तथा असहाय बालबालिकाका लागि संरक्षण केन्द्र सञ्चालनमा ल्याएको छ। सरस्वती माध्यमिक विद्यालय बनगाउँले माघ ३ गते सूचना जारी गर्दै पालिकाभित्र स्थायी बसोबास गर्ने १६ वर्षमुनिका बालबालिकालाई छात्रावासमा भर्ना खुलाएको हो।
विद्यालय व्यवस्थापन समितिको निर्णयअनुसार कार्यविधि २०८१ को आधारमा भर्ना प्रक्रिया सुरु गरिएको प्रधानाध्यापक खगेन्द्रबहादुर घर्तीमगरले जानकारी दिए। छात्रावासमा पहिले मुक्तकमलहरी बालबालिका बस्दै आएका थिए। अहिले कक्षा १२ सकिएको कारण छात्रावास खाली छ।
हालसम्म करिब २० बालबालिकाले आवेदन दिएका छन्। पालिकाले अभिभावकविहीन बालबालिकालाई छात्रावासमा राखी कक्षा १२ सम्मको शिक्षासहित लालनपालन गर्नेछ।
प्रधानाध्यापक रघुनाथ उपाध्याय र अभिभावक विमला चौधरीले सरकारद्वारा सञ्चालित संरक्षण केन्द्र सकारात्मक पहल भएको बताउँदै बालबालिकाको सुरक्षा, शिक्षा, पोषणमा टेवा पुग्ने उल्लेख गरे।
रासस
