धनगढी- धनगढीको कैलाली बहुमुखी क्याम्पसमा स्वतन्त्र विद्यार्थी युनियन (स्ववियु) निर्वाचनका लागि प्राज्ञिक विद्यार्थी परिषद् नेपालबाट लबदेव धामीले सचिव पदमा उम्मेदवारी दिएका छन्।
उम्मेदवारी दर्ता गराएर धामी अहिले अरुलाई पटकपटक हामीलाई एकटक भन्दै प्रचारप्रसारमा होमिएका हुन ।
धामीले आफू विद्यार्थीका समस्या समाधान गर्दै क्याम्पसलाई दलिय राजनीतिबाट मुक्त गर्ने लक्ष्यसहित अघि बढेको बताएका छन्। उनले क्याम्पसमा शिक्षाको गुणस्तर सुधार, प्राध्यापक तथा पुस्तकको उचित व्यवस्था, विद्यार्थी हकहितको रक्षा, र माफियातन्त्र अन्त्य गर्न आफू प्रतिबद्ध रहेको बताएका छन्।
धामी सानैदेखि समाजसेवा र पत्रकारितामा सक्रिय छन्। उनले सञ्चार माध्यममार्फत शिक्षा, राजनीति, र समाजमा रहेका विकृति-विसंगतिहरू उजागर गर्दै आएका छन्। साथै, उनले पत्रकारिता अध्ययन गर्ने विद्यार्थीहरूका लागि तालिम तथा प्रशिक्षण कार्यक्रमहरू सञ्चालन गर्दै आएका छन्।
उनको उम्मेदवारी शिक्षा क्षेत्रमा राजनीतिक हस्तक्षेपको विरोध, सर्वसाधारण विद्यार्थीलाई चुनाव लड्नबाट रोक्ने प्रवृत्तिको अन्त्य, र क्याम्पसलाई शिक्षाको वास्तविक केन्द्र बनाउनका लागि भएको उनको भनाइ छ। विद्यार्थीका हक, अधिकार र आवाज बुलन्द गर्न आफूले उम्मेदवारी दिएको धामीले स्पष्ट पारेका छन्।
