धनगढी – ऐश्वर्य बहुमुखी क्याम्पसमा स्ववियु निर्वाचनका क्रममा फर्जी मतदान गर्न खोज्ने एक युवकलाई प्रहरीले पक्राउ गरेको छ।
पक्राउ पर्नेमा डोटी जिल्लाको शिखर नगरपालिका-४ निवासी २५ वर्षीय भोजराज भट्ट रहेका छन्। कैलालीका प्रहरी नायब उपरीक्षक (डीएसपी) कबिन्द्र सिंह बोहराका अनुसार भट्ट कैलाली बहुमुखी क्याम्पसमा स्नातक तहमा अध्ययनरत विद्यार्थी हुन्।
प्रहरीका अनुसार भट्ट मतदान केन्द्रमा फर्जी मत हाल्न पुगेका थिए तर मत खसाल्न नपाउँदै उनलाई नियन्त्रणमा लिइएको हो। पक्राउ परेपछि घटनाले राजनीतिक मोड लिएको छ।
एमाले निकट अनेरास्ववियुले नेपाली कांग्रेस निकट विद्यार्थी संगठन नेविसंघमाथि फर्जी मतदानको आरोप लगाएको छ। अनेरास्ववियुका अनुसार चुनावमा धाँधली गर्न प्राध्यापकहरूले समेत संलग्न भएर नेविसंघका उम्मेदवारलाई जिताउन प्रयास गरिरहेका छन्।
यता, नेविसंघले भने उक्त आरोप अस्वीकार गर्दै निर्वाचनलाई निष्पक्ष बनाउन आफूहरू प्रतिवद्ध रहेको जनाएको छ। घटनाको निष्पक्ष छानबिन हुनुपर्ने माग गर्दै विद्यार्थी संगठनहरूबीच आरोप-प्रत्यारोप चलिरहेको छ।
यस विषयमा प्रहरी प्रशासनले आवश्यक अनुसन्धान अघि बढाइसकेको जनाएको छ।
