धनगढी- त्रिभुवन विश्वविद्यालय मातहत रहेका बझाङका ३ क्याम्पसहरूमा मात्रै आज स्वतन्त्र विद्यार्थी युनियन (स्ववियु) निर्वाचन सुरु भएको छ ।
जिल्लाका बझाङदीप बहुमुखी क्याम्पस , त्रिवेणी बहुमुखी क्याम्पस, र सुनकुडा बहुमुखी क्याम्पसमा मात्रै अहिले ८ बजेबाट निर्वाचन सुरु भएको हो ।
यसअघि छबिसपाथिभेरा गाउँपालिकामा रहेका सेती बहुमुखी क्याम्पस बगडगाउँ र शान्ति आदर्श बहुमुखी क्याम्पसमा सर्वसम्मत नेतृत्व चयन भइसकेको छ ।
निर्वाचनको प्रक्रिया सबै अगाडि बढाइएका अन्य क्याम्पसहरूमा भने विद्यार्थीको भर्नादर कम रहेका कारण निर्वाचन रोकिएको छ ।
थलारा गाउँपालिकामा रहेको थलारा बहुमुखी क्याम्पस, र खप्तडछान्ना गाउँपालिकामा रहेको खापरदेव बहुमुखी क्याम्पसमा विद्यार्थीको भर्ना संख्या कम भएकाले निर्वाचन गराउन नसकिएको क्याम्पस प्रशासनले जनाएको छ ।
चुनावमा भइरहेका तीन क्याम्पसमा एमाले निकट अनेरास्ववियु, काँग्रेस निकट नेविसंघ,नेकपा (एकीकृत समाजवादी) निकटको अनेरास्ववियु, विप्लव माओवादी निकटको अखिल समाजवादी र माओवादी निकट अखिल क्रान्तिकारी गरी पाँच विद्यार्थी संगठन चुनावमा होमिएका छन् ।
