चितवन : चितवनको नारायणी नदी किनारमा सुदूरपश्चिमेली समुदायले होली पर्व भव्य रूपमा सम्पन्न गरेको छ। मौलिक संस्कृति झल्काउने परम्परागत शैलीमा मनाइएको यस कार्यक्रममा सयौंको संख्यामा उपस्थित सुदूरपश्चिमेलीहरूले आपसी सद्भाव र एकताको सन्देश दिएका थिए।
सुदूरपश्चिम खप्तड सेवा समाज चितवनका अध्यक्ष जीवन रावलका अनुसार, यस किसिमका कार्यक्रमहरूले सुदूरपश्चिमेली पहिचानलाई उजागर गर्नुका साथै संस्कृतिको जगेर्ना गर्न सहयोग गर्ने बताइयो। उनले चितवनमा रहेका सुदूरपश्चिमेलीहरूलाई अझ संगठित बनाउन यस्ता गतिविधिहरू आवश्यक रहेको पनि बताए।
होली पर्वमा सहभागीहरूले रंग, संगीत र नृत्यको साथमा उल्लासमय वातावरण सिर्जना गरेका थिए। समाजले आगामी दिनहरूमा पनि यस किसिमका कार्यक्रमलाई निरन्तरता दिने योजना बनाएको छ।
