बझाङ : जयपृथ्वी बहुमुखी क्याम्पस, भौपुरमा विपद् व्यवस्थापनसम्बन्धी जनचेतनामूलक कार्यक्रम सम्पन्न भएको छ। क्याम्पस विपद् व्यवस्थापन क्षेत्रको आयोजनामा र क्याम्पस परिवारको सहकार्यमा आयोजित कार्यक्रममार्फत विद्यार्थीहरूलाई विपद् प्रतिकार्य, आत्मरक्षा र आगजनीबाट बच्ने उपायबारे जानकारी प्रदान गरियो।
कार्यक्रममा सशस्त्र प्रहरी बल, आश्रित गुल्मका डिएसपी दुर्गादत्त भट्टको नेतृत्वमा फिल्डमा प्रायोगिक कक्षाहरू (डेमो) सञ्चालन गरियो। सहभागीहरूले विपद्को समयमा आवश्यक सतर्कता र सुरक्षित उपायहरूको अभ्याससमेत गरे।
कार्यक्रमको अध्यक्षता प्राध्यापक डा. दीपकराज जोशीले गर्नुभएको थियो। उहाँले पछिल्लो समय बस्तीहरूमा देखिएको आगजनीजस्ता घटनालाई न्यूनिकरण गर्न समुदायमा जनचेतना फैलाउन आवश्यक रहेकोमा जोड दिनुभयो। कार्यक्रममा स्वागत मन्तव्य राख्दै शिक्षक भानु जोशीले विपद् व्यवस्थापन र आत्मरक्षाका उपायहरूको महत्त्वबारे प्रकाश पार्नुभयो।
सशस्त्र प्रहरी बलका प्रतिनिधिहरूले ग्यास आगलागीजस्ता घटनाबाट कसरी बच्ने भन्ने विषयमा प्रायोगिक प्रदर्शन गरे। कार्यक्रममा विद्यार्थी र शिक्षकहरूले प्रत्यक्ष रूपमा सहभागी भई प्रयोगात्मक सिकाइ हासिल गरेका थिए।
कार्यक्रम सञ्चालन शिक्षक खगेन्द्रप्रसाद जोशीले गर्नुभएको थियो। सहभागीहरूले विपद् व्यवस्थापनसम्बन्धी सिकाइले समाजलाई सुरक्षित बनाउन महत्त्वपूर्ण भूमिका खेल्नेमा विश्वास व्यक्त गरेका छन्।
विपद् व्यवस्थापनको महत्त्व बुझाउन आयोजित यो कार्यक्रमले विद्यार्थी र समुदायलाई सचेत गराउनुका साथै व्यावहारिक ज्ञान दिन सफल भएको सहभागीहरूको भनाइ छ। जयपृथ्वी बहुमुखी क्याम्पस यस क्षेत्रमा उदाहरणीय भूमिका खेलिरहेको छ।
