डोटी – सुदूरपश्चिम प्रदेश प्रमुख नजिर मियाँले सुदूरपश्चिम साँच्चै सुन्दरपश्चिम भएको बताएका छन्।
शुक्रवार डोटीमा आयोजित बहुभाषिक अन्तर्राष्ट्रिय साहित्यिक सङ्गोष्ठीमा बोल्दै प्रदेश प्रमुख मियाँले सुदूरपश्चिम कला, साहित्य र संस्कृतिको धनी क्षेत्र भएको उल्लेख गरे। उनले भने, “सांस्कृतिक रूपमा धनी सुदूरपश्चिम अतिथिका लागि सम्मान गर्ने संस्कारले पनि भरिपूर्ण छ। यो भौगोलिक रूपमा हिमाल, पहाड, तराई समेटिएको अनुपम क्षेत्र हो।”
प्रदेश प्रमुख मियाँले सुदूरपश्चिम आउनुअघि आफूलाई “अप्ठ्यारोमा पार्लान्, ख्याल गर्नु होला” भनेर सतर्क गराएको प्रसंग सुनाउँदै भने, “यहाँ त अप्ठ्यारो पार्ने होइन, माया र सम्मान गर्ने मन भएका मानिसहरू बस्दा रहेछन्।”
उनले सुदूरपश्चिमको प्राकृतिक सौन्दर्य र सांस्कृतिक धरोहरलाई राज्यले अझै पूर्ण रूपमा नचिनाएको टिप्पणी गरे। “कस्तुरीले आफ्नो शरीरमा रहेको बिनाको सुगन्ध थाहा नपाएझैं, राज्यले पनि सुदूरपश्चिमको सुन्दरता चिन्न सकेको छैन,” उनले भने।
प्रदेश प्रमुख मियाँले सुदूरपश्चिमको साहित्यिक क्षेत्रको विकासका लागि संघ, प्रदेश, र स्थानीय तहबीच समन्वय आवश्यक रहेको बताए। कार्यक्रममा सहभागी स्थानीय तहका प्रमुखहरूलाई कला, साहित्य तथा संस्कृति सम्बन्धी अध्ययन अनुसन्धानलाई प्राथमिकता दिन उनले सुझाव दिए।
साहित्यिक सिर्जना र सांस्कृतिक झाँकी प्रदर्शन
सुदूरपश्चिम प्रज्ञा प्रतिष्ठानको आयोजनामा सम्पन्न कार्यक्रममा नेपाल र भारतका विभिन्न क्षेत्रका स्रष्टाहरूले साहित्यिक प्रस्तुति राखेका थिए। प्रतिष्ठानका उपकुलपति डा. टी.एन. जोशीको अध्यक्षतामा सम्पन्न कार्यक्रममा सुदूरपश्चिम प्रदेश सभाका सदस्य चक्र बहादुर मल्ल र शिवसिंह ओली, डोटीका स्थानीय तहका प्रमुखहरू लगायतको उपस्थिति थियो।
कार्यक्रममा सुदूरपश्चिमको साहित्य, साहित्यिक पत्रकारिता, र डोटेली भाषाको संरक्षणका विषयमा व्यापक छलफल गरिएको थियो। विभिन्न सांस्कृतिक झाँकीहरूको आकर्षक प्रस्तुति कार्यक्रममा विशेष आकर्षण बनेको थियो।
