कैलाली, पुस २०
जिल्लाको विभिन्न स्थानमा भन्सार छली गरी ल्याइएको अन्दाजी रु. ४ लाख ११ हजार ७५० बराबरको अवैध मालसामान प्रहरीले बरामद गरी भन्सार कार्यालय पठाएको छ।
फुलबारीमा मोबाइल ग्लास, साडी र प्याज बरामद
वडा प्रहरी कार्यालय धनगढीबाट प्रहरी निरीक्षक योगेश खत्रीको नेतृत्वमा खटिएको टोलीले धनगढी उप-महानगरपालिका वडा नं. ७ स्थित फुलबारी बसपार्कबाट अन्दाजी रु. २ लाख ६७ हजार ७०० मूल्य बराबरका विभिन्न मोबाइलका ग्लास, साडी र प्याज बरामद गरेको छ।
टिकापुरमा सुर्तिजन्य पदार्थ र मोटरसाइकल बरामद
त्यसैगरी, प्रहरी चौकी सत्तीबाट प्रहरी सहायक निरीक्षक टेकबहादुर चन्दको नेतृत्वमा खटिएको टोलीले टिकापुर नगरपालिका वडा नं. ७, डाँडाबोझीबाट अन्दाजी रु. १ लाख ३५ हजार ५०० मूल्य बराबरका सुर्तिजन्य पदार्थ र मोटरसाइकल बरामद गरेको छ।
बिशालनगरबाट युरिया मल, चिनी र पानिपुरी फेला
त्यसैगरी, अस्थायी प्रहरी पोष्ट बिशालनगरबाट प्रहरी सहायक निरीक्षक भुपेन्द्र शाहीको नेतृत्वमा खटिएको टोलीले धनगढी उप-महानगरपालिका वडा नं. २, ट्राफिक चोकबाट अन्दाजी रु. ११ हजार ५५० मूल्य बराबरका चिनी, युरिया मल, बिडी, मोटरसाइकलको ब्याट्री र पानिपुरी बरामद गरेको छ।
प्रहरीका अनुसार, बरामद गरिएका सामग्रीहरु कानूनी प्रक्रिया पूरा गरी भन्सार कार्यालयमा पठाउने कार्य भइरहेको छ।
