धनगढी — परराष्ट्रमन्त्री तथा नेपाली कांग्रेसकी नेतृ आरजु राणा देउवाले आगामी निर्वाचनमा पुनः कैलालीबाटै उम्मेदवारी दिने घोषणा गरेकी छिन्। शनिबार धनगढीमा आयोजित कार्यकर्ता भेटघाट कार्यक्रममा बोल्दै उनले यसअघि चुनावमा पराजित भए पनि पुनः यही क्षेत्रबाट चुनाव लड्ने आफ्नो योजना रहेको स्पष्ट गरिन्।
“पहिला पनि यही क्षेत्रबाट चुनाव लडेको थिएँ, केही कारणले हारियो होला। फेरि पनि यही आएर चुनाव लड्ने मेरो विचार छ,” उनले भनिन्।
उनले पार्टीभित्र एकताको खाँचो औंल्याउँदै व्यक्तिगत स्वार्थका लागि राजनीति गर्न नहुने धारणा व्यक्त गरिन्। “सानो बच्चा जस्तो झगडा गरिरहेका छौं हामी। यस्तो कुरा राजनीतिक चरित्र होइन,” उनले कार्यकर्ताहरूलाई सम्झाउँदै भनिन्।
उनको यस घोषणाले कांग्रेस पार्टीभित्र नयाँ उत्साह र बहस सिर्जना गरेको छ। यस क्षेत्रका अन्य दलहरूसँगको प्रतिस्पर्धा र स्थानीय कार्यकर्ताको समर्थन आगामी निर्वाचनमा कस्तो हुने भन्ने विषयमा चासो बढेको छ।
यसअघि धनगढी क्षेत्रबाट चुनाव लडेकी राणा पराजित भएकी थिइन्। यसपटक उनले पार्टी पंक्तिलाई एकताबद्ध बनाएर जित सुनिश्चित गर्न रणनीति बनाइरहेकी बताइन्छ।
उनको यस अभिव्यक्तिले आगामी निर्वाचनमा पार्टीभित्र र क्षेत्रीय राजनीतिमा नयाँ बहस सुरु हुने अनुमान गरिएको छ।
