१७ असोज, काठमाडौं । इंग्लिस क्लब लिभरपुल र इटालियन क्लब युभेन्ट्सले युरोपियन च्याम्पियन्स लिगमा लगातार दोस्रो जित हात पारेको छ । लिभरपुलले घरेलु मैदानमा बोलोग्नालाई २-० ले पराजित गरेको हो ।
एनफिल्डमा भएको खेलमा लिभरपुलका लागि एलेक्सिस म्याक एलिस्टरले ११औं मिनेटमा गोल गर्दै अग्रता दिलाएका थिए । मोहमद सालाहले ७५औं मिनेटमा अर्को गोल थपे । लगातार दोस्रो जितपछि लिभरपुल ६ अंक जोडेर पाँचौ स्थानमा छ ।
यस्तै दश खेलाडी समेटिएको युभेन्ट्सले दुई पटक पछि परेको स्थिति उल्टाउँदै जर्मन क्लब लाइपजिगलाई ३-२ ले पराजित गरेको छ ।
लाइपजिगका लागि बेन्जामिन सेस्कोले ३०औं मिनेटमा गोल गर्दै अग्रता दिलाएका थिए । ५०औं मिनेटमा डुसान भ्लाहोभिकले युभेन्ट्सका लागि बराबरी ल गरे । ५९औं मिनेटमा भिएआरको सहयोगमा एम डी ग्रेगोरिओले रातो कार्ड पाएपछि युभेन्ट्स दश खेलाडीमा समेटियो ।
६५औं मिनेटमा सेस्कोले पेनाल्टीमा गोल गरेपछि लाइपजिगले पुन: अग्रता लियो । तर युभेन्ट्स एक खेलाडी कम भएको फाइदा लाइपजिगले उठाउन सकेन ।
६८औं मिनेटमा भ्लाहोभिचले व्यक्तिगत दोस्रो गोल गर्दै खेल २-२ को बराबरीमा ल्याए । ८२औं मिनेटमा फ्रानसिस्को कोन्सेइकाओले गोल गर्दै युभेन्ट्सलाई पहिलो पटक अग्रता दिलाए र त्यही गोल निर्णायक बन्दा युभेन्ट्सले जित हात पारेको हो ।
यस पटक फरक शैलीमा भइरहेको च्याम्पियन्स लिगमा ३६ टोलीको सहभागिता छ र दुई खेल हुँदा ७ क्लबले मात्र शतप्रतिशत जित हात पारेका छन् ।
