काठमाडौं- साविक विजेता लुम्बिनी लायन्स तेस्रो संस्करणको नेपाल प्रिमियर लिग (एनपीएल) को फाइनलमा पुगेको छ । पहिलो क्वालिफायरमा सुदूरपश्चिम रोयल्सलाई ६ विकेटले पराजित गर्दै लुम्बिनीले उपाधि भिडन्तमा आफ्नो स्थान सुरक्षित गरेको हो ।
कीर्तिपुरस्थित त्रिवि क्रिकेट मैदानमा मंगलबार भएको खेलमा सुदूरपश्चिमले दिएको १०६ रनको सामान्य लक्ष्य लुम्बिनीले १६.४ ओभरमा ४ विकेट गुमाएर पूरा गर्यो । लुम्बिनीले २० बल बाँकी छँदै जित निकालेको हो ।
लुम्बिनीको जितमा निरोशन डिकवेला नायक बने । उनले अविजित ५९ रनको अर्धशतकीय पारी खेले । कप्तान रोहित पौडेलले २१ रन जोड्दा सन्दीप जोराले ८ रन बनाए ।
लुम्बिनीको सुरुवात भने राम्रो हुन सकेन । पहिलो ओभरमै डार्सी शर्टलाई गुमाएको टोलीले ३.२ ओभरमा आसिफ शेखको विकेट पनि गुमायो । शर्टले खाता खोल्न सकेनन् भने आसिफले ४ रन मात्रै बनाए ।
त्यसपछि डिकवेला र रोहितले इनिङ्स सम्हाल्दै टोलीलाई जितको नजिक पुर्याए । रोहित २१ रनमा आउट भए पनि डिकवेला अन्तिमसम्म क्रिजमा रहेर टोलीलाई जित दिलाउन सफल भए ।
बलिङमा सुदूरपश्चिमका थरिन्दु रत्नायकेले दुई विकेट लिए । हेमन्त धामी र स्कट कुगलेइनले एक–एक विकेट हात पारे ।
त्यसअघि टस हारेर पहिले ब्याटिङ गरेको सुदूरपश्चिमले निर्धारित २० ओभरमा ८ विकेट गुमाउँदै १०५ रन बनाएको थियो ।
सुदूरपश्चिमको ब्याटिङ सुरुदेखि नै कमजोर देखियो । पहिलो बलमै जर्ज मन्से आउट भएपछि दबाबमा परेको टोलीले पावरप्लेमा तीन विकेट गुमाएर २० रन मात्रै जोडेको थियो । पहिलो १० ओभरमा पनि टोलीले तीन विकेटको क्षतिमा ४० रन मात्रै बनाउन सक्यो ।
ईशान पाण्डे र दीपेन्द्र सिंह ऐरीले केही समय इनिङ्स सम्हाल्ने प्रयास गरे । पाण्डेले ३३ बलमा २७ रन बनाएर रनआउट भए । दीपेन्द्रले भने ५१ बलमा ५२ रनको अर्धशतकीय पारी खेले । उनीबाहेक अन्य ब्याटरले दोहोरो अंकमा रन बनाउन सकेनन् ।
सुदूरपश्चिमका लागि विनोद भण्डारी र थनुका दबारेलले समान ३ रन बनाए । थरिन्दु रत्नायकेले १ रन मात्रै जोड्न सके ।
लुम्बिनीका बलर रुबेन ट्रम्पलमान र शेर मल्लले समान दुई विकेट लिए । अभिशेष गौतम र किशोर महतोको नाममा एक–एक विकेट रह्यो ।
यस जितसँगै लुम्बिनीले सिधै फाइनलमा स्थान बनाएको छ । पराजित सुदूरपश्चिमले भने फाइनल प्रवेशको अर्को अवसर पाउनेछ । उसले एलिमिनेटरको विजेतासँग दोस्रो क्वालिफायरमा प्रतिस्पर्धा गर्नेछ ।

