बझाङ- बझाङको बित्थडचिर गाउँपालिका-९ सुनकुडामा सम्पन्न तेस्रो जय नेपाल वडाध्यक्ष कप टी-१२ क्रिकेट प्रतियोगिताको उपाधि बुङ्गल नगरपालिका-६ ले जितेको छ।
मंगलबार भएको फाइनल खेलमा आयोजक टोलीलाई पराजित गर्दै बुङ्गल-६ ले उपाधि आफ्नो पक्षमा पारेको हो।
उपाधिसँगै विजेता बुङ्गल-६ ले नगद ६६ हजार ६ सय ६६ रुपैयाँसहित ट्रफी, मेडल र प्रमाणपत्र प्राप्त गरेको छ। त्यस्तै, उपविजेता बनेको आयोजक टोलीले नगद ३३ हजार ३ सय ३३ रुपैयाँसहित ट्रफी, मेडल र प्रमाणपत्रमा चित्त बुझाएको छ।
बित्थडचिर गाउँपालिका वडा नम्बर ९ को वार्षिक कार्यक्रमअन्तर्गत तिहार तथा छठ पर्वको अवसर पारेर प्रतियोगिता आयोजना गरिएको हो। स्थानीय युवामा रहेको खेल प्रतिभा पहिचान तथा प्रवर्द्धन गर्दै स्थानीय, प्रदेश र राष्ट्रियस्तरका खेलाडी उत्पादनमा योगदान पुर्याउने उद्देश्यले प्रतियोगिता सञ्चालन गरिएको गाउँपालिका प्रवक्ता तथा वडाध्यक्ष हरिश्चन्द्र जोशीले जानकारी दिए।
कार्तिक २० गतेदेखि सुरु भएको प्रतियोगितामा बझाङ जिल्लाभरका २१ टोलीको सहभागिता रहेको थियो।
वडाध्यक्ष जोशीको अध्यक्षतामा सम्पन्न समापन कार्यक्रममा निवर्तमान गाउँपालिका उपाध्यक्ष जानकी बोहरा प्रमुख अतिथि तथा वडा नम्बर ७ का वडाध्यक्ष दिनेश अधिकारी विशिष्ट अतिथिका रूपमा सहभागी थिए। कार्यक्रममा बुङ्गल नगरपालिका–६ का वडाध्यक्ष, स्थानीय समाजसेवी, बुद्धिजीवी, राजनीतिज्ञ तथा गाउँपालिकाका कर्मचारीलगायतको उपस्थिति रहेको थियो।

