काठमाडौं- नेपाल प्रिमियर लिग (एनपीएल) क्रिकेटको तेस्रो संस्करण सञ्चालनका लागि सम्पूर्ण तयारी पूरा भएको छ। नेपाल क्रिकेट संघ (क्यान) को आयोजनामा हुने प्रतियोगिता भोलिदेखि त्रिवि अन्तर्राष्ट्रिय क्रिकेट मैदानमा सुरु हुँदैछ। मंसिर ५ गतेसम्म चल्ने प्रतियोगितामा आठ फ्रेन्चाइज टोलीले प्रतिस्पर्धा गर्नेछन्।
प्रतियोगिताको पहिलो खेलमा अघिल्लो संस्करणको विजेता लुम्बिनी लायन्स र उपविजेता सुदूरपश्चिम रोयल्स आमनेसामने हुनेछन्। भोलि साँझ ५ बजे सुरु हुने उक्त खेलसँगै एनपीएलको तेस्रो संस्करण औपचारिक रूपमा आरम्भ हुनेछ।
यस संस्करणको मुख्य आकर्षणका रूपमा पहिलोपटक निर्णय पुनरावलोकन प्रणाली (डीआरएस) प्रयोग गरिँदैछ। हक–आई प्रविधिमा आधारित यो प्रणालीले अम्पायरका निर्णयमाथि पुनरावलोकन गर्न सकिने सुविधा दिनेछ। प्रत्येक इनिङ्समा टोलीले दुईवटासम्म निर्णय चुनौती दिन पाउने व्यवस्था गरिएको छ। यसबाट खेलमा निष्पक्षता कायम गर्न सहयोग पुग्ने अपेक्षा गरिएको छ।
अन्तर्राष्ट्रिय क्रिकेट परिषद् (आईसीसी) बाट मान्यता प्राप्त भएपछि प्रतियोगिताको महत्त्वसमेत बढेको छ। यसपटक अन्तर्राष्ट्रिय क्रिकेटमा अनुभव बटुलेका विदेशी खेलाडीहरूको सहभागिताले नेपाली खेलाडीलाई आफ्नो क्षमता प्रदर्शन गर्ने र अन्तर्राष्ट्रिय स्तरको प्रतिस्पर्धात्मक अनुभव हासिल गर्ने अवसर प्रदान गर्नेछ।
दर्शकको सुविधा र खेलको व्यवस्थापनलाई ध्यानमा राख्दै त्रिवि मैदानमा विभिन्न पूर्वाधार थपिएका छन्। मैदानमा करिब दुई हजार दर्शक अट्ने अतिरिक्त सिट, छानासहितको दर्शकदीर्घा, एलईडी स्कोरबोर्ड, डिजिटल बाउन्ड्री बोर्ड तथा सञ्चारकर्मीका लागि मिडिया सेन्टरको व्यवस्था गरिएको छ।
प्रतियोगिताका सबै ३२ खेल त्रिवि अन्तर्राष्ट्रिय क्रिकेट मैदानमै सञ्चालन हुनेछन्। सहभागी टोलीमा लुम्बिनी लायन्स, सुदूरपश्चिम रोयल्स, विराटनगर किङ्स, चितवन राइनोज, जनकपुर बोल्ट्स, पोखरा एभेन्जर्स, कर्णाली याक्स र काठमाडौं गोर्खाज रहेका छन्।
लिग चरणमा प्रत्येक टोलीले बाँकी सात टोलीसँग एक–एक खेल खेल्नेछ। लिग चरणको समाप्तिपछि अंकतालिकामा शीर्ष स्थानमा रहने चार टोलीले प्लेअफमा स्थान बनाउनेछन्।
