धनगढी । मोटरसाइकल दुर्घटनामा परी गम्भीर घाइते भएका कञ्चनपुरको दोधारा चाँदनी नगरपालिका–२ का २७ वर्षीय दीपक भट्टको धनगढीस्थित माया मेट्रो अस्पतालले करिब ९ लाख रुपैयाँ बराबरको निःशुल्क उपचार गरेको छ।
आफैँले चलाएको मोटरसाइकल दुर्घटनामा परी टाउकोमा गम्भीर चोट लागेका भट्टलाई सुरुमा महाकाली अस्पताल लगिएको थियो। त्यहाँ थप उपचार सम्भव नभएपछि उनलाई धनगढीस्थित माया मेट्रो अस्पताल ल्याइएको थियो।
भट्टको अवस्था गम्भीर रहेकाले लामो समय उपचार गर्नुपर्ने र उपचार खर्चसमेत ठूलो हुने भएपछि परिवार चिन्तित बनेको थियो। आर्थिक अवस्था कमजोर भएका कारण उपचार खर्च जुटाउन समस्या भएपछि माया मेट्रो अस्पतालले मानवीय आधारमा उनको उपचार निःशुल्क गर्ने निर्णय गरेको हो।
भट्टलाई १५ दिनसम्म भेन्टिलेटरमा राखिएको थियो भने २० दिन सघन उपचार कक्ष (आईसीयू) मा उपचार गरिएको थियो। त्यसपछि सामान्य शय्यामा राखेर उपचारलाई निरन्तरता दिइएको अस्पतालले जनाएको छ। लामो उपचारपछि उनको स्वास्थ्यमा उल्लेख्य सुधार आएको र उपचार सफल भएको अस्पतालले जनाएको छ।
भट्टको उपचारमा न्युरोसर्जन डा. हरि पौडेल, जिआई सर्जन डा. विनय तिमिल्सिना, अर्थोपेडिक सर्जन डा. विकास पाण्डे, डा. रितेश पोखरेल, एनेस्थेसियोलोजिस्ट डा. मोहन भट्ट र डा. ललित धामी लगायतको चिकित्सकीय टोली संलग्न थियो।
माया मेट्रो अस्पतालका अध्यक्ष धिरेन्द्र साउँदले भट्टको पारिवारिक आर्थिक अवस्था अत्यन्त कमजोर रहेकाले मानवीयताका आधारमा निःशुल्क उपचार गर्ने निर्णय गरिएको बताए।
“अस्पतालमा आइसकेको बिरामीलाई हामीले पनि फिर्ता पठाउन मनले मानेन। त्यसैले निःशुल्क उपचार गर्ने निर्णय ग¥यौँ,” अध्यक्ष साउँदले भने।
उनका अनुसार भट्टको उपचारमा हालसम्म करिब ९ लाख रुपैयाँ खर्च भएको छ, जुन रकम अस्पतालले मिनाहा गरेको हो।
गम्भीर अवस्थामा अस्पताल पुगेका भट्टको लामो उपचारपछि स्वास्थ्यमा सुधार आउनुका साथै आर्थिक अभावका कारण उपचारबाट वञ्चित हुनुपर्ने अवस्था पनि अस्पतालको सहयोगका कारण टरेको छ।
माया मेट्रो अस्पतालले गरेको यो सहयोग स्वास्थ्य उपचारमा मात्र सीमित नभई मानवीय सेवाको उदाहरण समेत बनेको छ।
