बझाङ – बझाङको बित्थडचिर गाउँपालिका- ९ स्थित सुनकुडा स्वास्थ्य चौकी अन्तर्गतका वडा नम्बर ७, ८ र ९ लाई पूर्ण खोप सुनिश्चित वडा घोषणा गरिएको छ। आइतबार स्थानीय स्वामित्व र सहभागिता , पूर्ण खोप सुनिश्चितता हाम्रो प्रतिबद्धता भन्ने नारा सहित सेवा क्षेत्रभित्रका सबै बालबालिकाले निर्धारित खोप पूरा गरेपछि वडाहरूलाई पूर्ण खोप सुनिश्चित घोषणा गरिएको हो।
जन्मदेखि १५ महिनासम्मका बालबालिकाले सरकारले तोकेको सम्पूर्ण खोप पाए/नपाएको यकिन गर्न विस्तृत तथ्यांक संकलन गरिएको थियो। यस क्रममा तीनै वडामा घरधुरी सर्वेक्षण सञ्चालन गरी ५ वर्षमुनिका सबै बालबालिकाको खोप अवस्थाको पहिचान गरिएको थियो।
सर्वेक्षणका क्रममा छुट खोप भएका बालबालिकालाई पहिचान गरी लक्षित रूपमा खोप सेवा प्रदान गरिएको सुनकुडा स्वास्थ्य चौकी प्रमुख राजेन्द्र बिष्टले जानकारी दिए । यस अभियानमा स्वास्थ्यकर्मी, महिला स्वास्थ्य स्वयंसेविका, जनप्रतिनिधि तथा स्थानीय समुदायको सक्रिय सहभागिता रहेको थियो।
कार्यक्रममा बोल्दै कार्यक्रमका प्रमुख अतिथि वडा सदस्य रामप्रसाद अवस्थीले बालबालिकालाई रोगबाट जोगाउन खोप अत्यन्त प्रभावकारी माध्यम भएको उल्लेख गर्दै आगामी दिनमा पनि नियमित खोप कार्यक्रमलाई थप सुदृढ बनाइने बताए। साथै, अभिभावकलाई समयमै बालबालिकालाई खोप लगाउन आग्रह गरिएको थियो।
पूर्ण खोप सुनिश्चितता घोषणासँगै ती वडाहरूमा खोपसम्बन्धी सचेतना वृद्धि हुनुका साथै बालस्वास्थ्य सुधारमा सकारात्मक प्रभाव पर्ने अपेक्षा गरिएको छ। स्वास्थ्य संस्थाले आगामी दिनमा पनि नियमित अनुगमन तथा छुट खोपको खोजी कार्यलाई निरन्तरता दिने जनाएको छ।
कार्यक्रम वडा सदस्य तथा स्वास्थ्य चौकी व्यवस्थापन समिति उपाध्यक्ष अनुशा विष्टको अध्यक्षतामा भएको थियोे ।
कार्यक्रम सञ्चालन सामुदायिक स्वास्थ्य इकाई मल्लाधारी इन्चार्ज डम्मर बिष्टले गर्नुभएको थियो ।
