अछाम- चुनावको मिति नजिकिँदै जाँदा अछाम क्षेत्र नं- १ मा राजनीतिक सरगर्मी झन् बढेको छ। यही क्रममा डा. भीम रावल नेतृत्वको नेपाली कम्युनिष्ट पार्टी लाई ठूलो धक्का लागेको छ।
जिल्लाको रामारोशन गाउँपालिका-६ मा आयोजित चुनावी आमसभाका बीच विभिन्न पार्टी परित्याग गर्दै ९२ जना नेकपा एमाले मा समाहित भएका छन्। एमाले उम्मेदवार दिपक साउँदको जन्मथलो भटाकाटियामा आयोजित कार्यक्रममा पूर्व माओवादी तथा हाल नेकपा, नेपाली काँग्रेस र राष्ट्रिय स्वतन्त्र पार्टी परित्याग गरेका नेता-कार्यकर्ताहरू एमालेमा प्रवेश गरेका हुन्।
पालिका कमिटी अध्यक्ष भीष्म साउँदका अनुसार नेपाली कम्युनिष्ट पार्टीबाट ८४ जना, नेपाली काँग्रेसबाट ७ जना र राष्ट्रिय स्वतन्त्र पार्टीबाट १ जना गरी कुल ९२ जना एमालेमा समाहित भएका छन्। सुमन परियार, रमेश साउँद, रमित साउँद, कमल वि.क र लक्ष्मण साउँद लगायतका नेताहरूले आजैदेखि एमालेको सक्रिय सदस्यका रूपमा काम गर्ने घोषणा गरेका छन्।
एमाले प्रवेशसँगै उनीहरूले अछाम क्षेत्र नं.- १ का प्रतिनिधि सभा सदस्य उम्मेदवार दिपक साउँद लाई विजयी गराउन कटिबद्ध भएर लाग्ने प्रतिबद्धता जनाएका छन्। चुनावको मुखमै भएको यो प्रवेशले स्थानीय राजनीतिक समीकरणमा उल्लेख्य प्रभाव पार्ने विश्लेषण गरिएको छ।
चुनावी प्रतिस्पर्धा चर्किँदै गइरहेका बेला भएको यस घटनालाई क्षेत्रीय राजनीतिमा महत्वपूर्ण मोडका रूपमा हेरिएको छ।
