अछाम- चुनाव नजिकिँदै जाँदा अछामको राजनीतिक माहोल झनै तातिएको छ। यही क्रममा सुदूरपश्चिम प्रदेश सरकारकी पूर्व राज्यमन्त्री तथा नेपाली कम्युनिस्ट पार्टीकी केन्द्रीय सदस्य मिना साउँदसहित ७५ भन्दा बढी नेता तथा कार्यकर्ता नेकपा एमालेमा समाहित भएका छन्।
केन्द्रीय, प्रदेश तथा जिल्ला तहका विभिन्न संगठनमा आवद्ध प्रभावशाली व्यक्तिहरू एकैसाथ एमालेमा प्रवेश गरेपछि अछामको राजनीतिक समीकरणमा उल्लेख्य फेरबदल आएको छ।
यो घटनालाई अछाम क्षेत्र नम्बर- १ मा नेपाली कम्युनिष्ट पार्टीका तर्फबाट उम्मेदवार रहेका डा. भीम रावलका लागि चुनावकै मुखमै ठूलो धक्काका रूपमा लिइएको छ। लामो समयदेखि स्थापित नेताका रूपमा परिचित रावलका आफ्नै राजनीतिक आधार क्षेत्रबाट नेताहरू बाहिरिन थालेपछि उनको लागि परिस्थिति चुनौतीपूर्ण बनेको विश्लेषण हुन थालेको छ।
यता, एमाले उम्मेदवार दिपक साउँद का लागि भने यो समाहित अभियानले थप ऊर्जा र मनोबल प्रदान गरेको छ। पूर्व राज्यमन्त्रीसहित प्रभावशाली नेताहरूको समर्थन प्राप्त भएसँगै साउँदको चुनावी अभियान अझ सशक्त र प्रभावकारी बन्दै गएको एमाले वृत्तको दाबी छ।
एमालेका केन्द्रीय सदस्य तथा अछाम जिल्ला इन्चार्ज झपट बोहरा ले पार्टीमा समाहित हुने सबैलाई स्वागत गर्दै अछाममा एमालेप्रतिको जनलहर तीव्र रूपमा बढ्दै गएको बताए। जनताको विश्वास र समर्थन दिनप्रतिदिन सुदृढ हुँदै गएको उनको भनाइ छ।
राजनीतिक विश्लेषकहरूका अनुसार चुनावअघि भएको यो सामूहिक समाहितले अछामको चुनावी प्रतिस्पर्धालाई नयाँ मोडमा पुर्याएको छ। एमालेप्रति जनआकर्षण बढ्दै गएको संकेतका रूपमा यस घटनालाई हेरिएको छ भने विपक्षी उम्मेदवारहरूका लागि यो ठूलो चुनौतीका रूपमा देखिएको छ।
Advertisement
