काठमाण्डौ- आउँदो फागुन २१ गते हुने प्रतिनिधिसभा निर्वाचनको तयारी स्वरूप सुरु गरिएको मतदाता नामावली संकलन तथा अद्यावधिक अभियानमा जनताको सहभागिता क्रमशः बढ्दै गएको छ।
दशैँ, तिहार र छठ पर्वका कारण केही समय सहभागिता कम देखिए पनि पछिल्ला दिनमा मतदाता नाम दर्ता गराउनेको संख्या उल्लेख्य रूपमा बढेको निर्वाचन आयोगले जनाएको छ।
आयोगका अनुसार सातै प्रदेश र सबै जिल्लाका निर्वाचन कार्यालयमा दैनिक बिहान ८ बजेदेखि बेलुका ६ बजेसम्म मतदाता नामावली संकलन र अद्यावधिकको काम भइरहेको छ। असोज ९ गतेदेखि सुरु भएको अभियानअन्तर्गत हालसम्म एक लाखभन्दा बढी नयाँ मतदाता थपिएका छन्।
यो अभियान यस महिनाभर जारी रहनेछ। १६ वर्ष उमेर पूरा गरी नागरिकता लिएका व्यक्तिले मतदाता नामावलीमा आफ्नो नाम दर्ता गर्न सक्नेछन्। तर फागुन २१ गते हुने निर्वाचनमा मतदान गर्न चाहनेले भने फागुन २० गतेसम्म १८ वर्ष पूरा गरेको हुनुपर्छ।
नाम दर्ता गर्न सम्बन्धित निर्वाचन कार्यालय वा आयोगले तोकेको दर्ता केन्द्रमा उपस्थित भई नागरिकता प्रमाणपत्रका साथ जैविक विवरण (बायोमेट्रिक) दिनुपर्नेछ। इच्छुकले अनलाइनमार्फत प्रि–रजिष्ट्रेसन (पूर्वदर्ता) पनि गराउन सक्ने व्यवस्था गरिएको छ।
यदि नागरिकता प्रमाणपत्रमा रहेको ठेगाना भन्दा फरक स्थानमा स्थायी बसोबास गरिएको छ भने बसाइँसराइ प्रमाणपत्र वा विवाहपछि नयाँ ठेगानामा आएको हकमा विवाह दर्ता प्रमाणपत्र पेश गर्नुपर्ने आयोगले जनाएको छ।
