बझाङ- बझाङको केदारस्यूँ गाउँपालिका–४ सैन्स्सुस्थित जगन्नाथ माध्यमिक विद्यालयमा च्याउ खेती कार्यक्रमको सुरुवात गरिएको छ ।
सोमबारदेखि औपचारिक रूपमा पढ्दै कमाउँदै’ कार्यक्रमअन्तर्गत च्याउ खेती कार्यक्रमको सुरुवात गरिएको हो। यस अभियानलाई विद्यालय व्यवस्थापन समिति अध्यक्ष समेत रहेका युवा नेता भरत बहादुर मल्लको विशेष पहलमा अघि बढाइएको हो।
विद्यालयले कक्षा ११ र १२ मा अध्यनरत विद्यार्थीलाई आत्मनिर्भर बनाउन र व्यावहारिक सीप प्रदान गर्ने उद्देश्यका साथ च्याउ खेतीलाई प्राथमिकता दिएको विव्यस अध्यक्ष मल्लले कामना टुडेसँग बताए ।
केही समय अघि विद्यालय व्यवस्थापन समिति अध्यक्षको जिम्मेवारी पाएका मल्लले पालिकामै पहिलोपटक विद्यालय स्तरमा च्याउ खेती कार्यक्रमको सुरुवात गरेका हुन् । पालिकामा अहिलेसम्म कुनै पनि विद्यालय व्यवस्थापन समितिले विद्यार्थीलाई आत्मनिर्भर तर्फ जोड्नका लागि काम गरेको देखिएको छैन,अध्यक्ष मल्लको यो कदमले नयाँ सन्देश दिएको छ।
च्याउ खेतीका लागि आवश्यक सामग्री तय गर्न विद्यालय व्यवस्थापन समिति, विद्यालयका शिक्षक शिक्षिकाले विशेष साथ दिएका छन् । हरितालिका तीजको समयमा पनि शिक्षिकाहरूले च्याउ खेती कार्यक्रमको सुरुवात गर्नमा विशेष सहयोग गरेको अध्यक्ष मल्लको भनाइ छ ।
अध्यक्ष मल्लले च्याउ खेती कार्यक्रम प्रति शिक्षक शिक्षिका र विव्यस टिमले देखाएको सक्रियता र साथका लागि आभार प्रकट गरेका छन् ।
यसअघि बझाङदीप क्याम्पस झोतामा विद्यार्थी नेता कमल सीको पहलमा च्याउ खेती कार्यक्रम सञ्चालन गरिएको थियोे । कमलले क्याम्पसमा छात्रावासको पनि स्थापना गरेका थिए ।
