बझाङ- जसको कोही छैन, त्यसको जिल्ला प्रशासन” भन्ने भनाइलाई सत्य साबित गर्दै बुङगल नगरपालिकामा भएको रोजगार संयोजकको परीक्षा निष्पक्ष र पारदर्शी भएको पाइएको छ ।
नगरपालिकाले एक सिटका लागि भर्ना खोलेको रोजगार संयोजक पदमा १० जनाले आवेदन दिएका थिए । तर, शनिबार जिल्ला प्रशासन कार्यालय बझाङको सभाहलमा भएको परीक्षामा ६ जना मात्र सहभागी भए ।
सामाजिक विकास कार्यालयका प्रमुख प्रयागराज जोशी विषय विज्ञका रुपमा परीक्षामा उपस्थित हुनु भएको थियो । स्थानीयबासीका अनुसार जिल्ला प्रशासनले लिएको परीक्षा निष्पक्ष र पारदर्शी भएको छ ।
सहभागी परीक्षार्थीले पनि प्रशासनले पहुँच र पावरभन्दा बाहिर गएर न्यायपूर्ण ढंगले परीक्षा सञ्चालन गरेको भन्दै प्रशंसा गरेका छन् । “मसँग कोही थिएन, तर प्रशासनले निष्पक्ष परीक्षा लिन्छ भन्नेमा ढुक्क थिएँ । अन्ततः परीक्षा मर्यादित, निष्पक्ष र पारदर्शी भयो,” एक परीक्षार्थीले प्रतिक्रिया दिए ।
पछिल्लो समय बुङ्गलमा परीक्षा फितलो हुने र पहुँचवालामात्र छानिने गुनासो भइरहेकाले जिल्ला प्रशासनमार्फत परीक्षा लिइएको निमित्त प्रमुख प्रशासकीय अधिकृत माधव प्रसाद जोशीले जानकारी दिनुभयो । प्रमुख जिल्ला अधिकारी कैलाश ठकुरीले पनि “नेता र मन्त्रीहरूको दबाब तथा पहुँचले काम नगरेको” भन्दै प्रसन्नता व्यक्त गर्नुभयो ।
परीक्षामा बुङ्गल नगरपालिका–९ का पुष्पराज जोशी नगरपालिकाको रोजगार संयोजकमा नाम निकाल्न सफल भएकाका छन् । भने धनबहादुर बोहरा वैकल्पिक उम्मेदवार बनेका छन् । जोशीले निष्पक्ष परीक्षा गरिदिएकोमा जिल्ला प्रशासनलाई धन्यवाद दिएका छन् ।
