कैलाली- विश्व रामसार क्षेत्रमा सूचीकृत घोडाघोडी तालमा हरिहाँसको संख्या घटेको छ। यस वर्ष गर्मीयामको गणनामा हरिहाँसको संख्या १२६ मात्र रहेको नेपाल पक्षी संरक्षण संघका फिल्ड अधिकृत हिरुलाल डगौराले जानकारी दिए। अघिल्लो वर्ष यो संख्या २२५ थियो।
नेपाल पक्षी संरक्षण संघ (बिसिएन) र डिभिजन वन कार्यालय पहलमानपुरको समन्वयमा असार २४ देखि २६ गतेसम्म गणना गरिएको हो। गर्मीयाम ‘ब्रिडिङ सिजन’ भएकाले हरिहाँसहरू अन्य सिमसार क्षेत्रमा गएर देखिने संख्या कम हुने गरेको बताइएको छ।
घोडाघोडी ताललाई सन् २००३ मा रामसार सूचीमा राखिएको थियो। त्यति बेला यहाँ करिब १,००० हरिहाँस रहेका थिए। तर पछिल्लो समय प्राकृतिक बासस्थानको विनाश, विषादीको प्रयोग र मानवीय गतिविधिका कारण चराको संख्या घट्दो क्रममा छ।
चरासम्बन्धी अध्ययन गर्ने संस्था चरा संरक्षण नेटवर्कका अनुसार सन् २०२३ मा हरिहाँसको संख्या २१२, सन् २०२४ मा २२५ र अहिले घटेर १२६ पुगेको हो। घोडाघोडी तालको सूचक प्रजातिमा हरिहाँस, मगर गोही र जंगली धान पर्छन्।
