अछाम- अछामको पञ्चदेवल विनायक नगरपालिका–२ स्थित सरस्वती माध्यमिक विद्यालयमा विज्ञान विषयको परीक्षा शिक्षकले प्रश्नपत्र नदिएपछि रद्द गरिएको छ।
विद्यालयका विज्ञान शिक्षक दमन बुढाले पाँच महिनादेखि तलब नपाएको भन्दै बिहीबार कक्षा ६ देखि १० सम्म सञ्चालन हुने विज्ञान विषयको त्रैमासिक परीक्षाको प्रश्नपत्र विद्यालयमा बुझाउन अस्वीकार गरेपछि परीक्षा स्थगित भएको हो।
विद्यालयका प्रधानाध्यापक श्यामबहादुर धामीका अनुसार बिहान ११ बजेदेखि सञ्चालन हुने भनिएको परीक्षा शिक्षकले प्रश्नपत्र नदिएपछि एक घण्टा ढिलो गरी सामाजिक विषयको परीक्षा सञ्चालन गरिएको थियो। विज्ञान विषयको परीक्षा कहिले हुने भन्ने टुंगो लागेको छैन।
विज्ञान विषयको तयारी गरेर विद्यालय पुगेका विद्यार्थीहरू सामाजिक विषयको परीक्षा दिनुपर्दा अन्योलमा परेका थिए।
