अछाम- अछामको बान्नीगढी जयगढ गाउँपालिका–६ दर्ना गाउँमा नेपाल विद्युत् प्राधिकरणले लाइन काटिदिएपछि बालबालिकाहरू सडकको सोलार बत्तीको सहारामा पढ्न बाध्य भएका छन्। स्थानीय विद्युत् समितिले ४२ लाख रुपैयाँ प्राधिकरणलाई तिर्न बाँकी रहेपछि प्राधिकरणले करिब ६६५ घरधुरीको लाइन काटेको हो।
स्थानीय स्तरमा विद्युत् व्यवस्थापनका लागि गठन गरिएको समितिले नेपाल विद्युत् प्राधिकरणसँग तीन महिनाको करार सम्झौता गरी वितरण गर्दै आएको थियो। सम्झौता अनुसार ग्राहकले प्रतियुनिट १५ रुपैयाँ तिर्ने, जसमध्ये १२ रुपैयाँ प्राधिकरण र ३ रुपैयाँ समितिका कर्मचारी खर्चमा छुट्याउने सहमति थियो। बत्ती मात्र बाल्ने ग्राहकका लागि भने मासिक २५० रुपैयाँ लिने व्यवस्था गरिएको थियो।
तर, प्राधिकरणको टीओडी मिटरमा देखिएको वास्तविक खपतअनुसार महसुल उठ्न नसक्दा समिति घाटामा गयो र बक्यौता ४२ लाख पुगेपछि प्राधिकरणले विद्युत् सेवा बन्द गर्यो।
विद्युत् नहुँदा बालबालिकाहरूले राति सडक छेउको सोलार बत्तीमुनि पढ्नुपर्ने अवस्था आएको स्थानीय गणेश साउँदले बताए। स्थानीयवासीहरूले अब समिति होइन, प्राधिकरणले नै प्रत्यक्ष रूपमा विद्युत् वितरण गर्नुपर्ने माग गरेका छन्।
