उत्तमकुमार थापा, बझाङ
बझाङ जिल्लाको तलकोट गाउँपालिका उपाध्यक्ष पार्वती कुवर भण्डारीले आफ्नो कार्यकालभरि महिलाका एजेन्डालाई प्राथमिकता दिँदै स्थानीय तहमा सकारात्मक परिवर्तन ल्याउँदै आएकी छन्।
स्थानीय सरकारको उपाध्यक्षको जिम्मेवारी सम्हालिरहेकी भण्डारी न्यायिक समितिको संयोजकसमेत हुन्। उनले समाजका हरेक मुद्दालाई व्यक्तिगत पिडाको रूपमा लिएर काम गरिरहेको बताउँछिन्।
“महिलाको पिडा अब लुकाउने कुरा होइन,” उपाध्यक्ष भण्डारीले भनिन्, “अब कसैले अन्यायमा परेमा मलाई सिधै सम्पर्क गर्न सक्नुहुन्छ।”
गाउँघरका दिदीबहिनीका पीडा बुझ्दै उनले महिलालाई आत्मनिर्भर बनाउन विभिन्न सीप विकास तालिमहरू जस्तै हाते होजियारी, सिलाइकटाइ, अल्लो प्रशोधनलगायतका कार्यक्रम सञ्चालन गर्दै आएकी छन्। साथै, वृद्धावस्थाका नागरिकहरूका लागि लुगा वितरण तथा पोषण कार्यक्रम पनि उनले गाउँमै सञ्चालन गरेकी छन्।
सामुदायिक साझेदारी र स्वास्थ्य सेवाको पहुँच
बिकट भौगोलिक क्षेत्र मानिने तलकोटका वडाहरू—जस्तै वडा नं. ७ को किदन्ना गैतोला, वडा नं. ६ र वडा नं. ४ को पनाल्त ल्वाउडा कुवा लगायतका गाउँहरूमा उपाध्यक्ष भण्डारीको पहलमा स्वास्थ्य क्लिनिक तथा सेवा विस्तार भइसकेको छ।
उनका अनुसार, “गाउँगाउँमा पुगेर समुदायको आवश्यकतालाई बुझ्दै विकासका काम अघि बढाइएका छन्।”
भौतिक पूर्वाधारमा समेत सुधार
तलकोट गाउँपालिकामा अहिले जडिबुटी पहुँचमार्गअन्तर्गत सडक स्तरोन्नतिको काम भइरहेको छ भने पर्यटकीय स्थलहरूको विकाससमेत निर्माणाधीन अवस्थामा रहेको छ। अधिकांश बस्तीमा सडक र विद्युत् विस्तार भइसकेको छ।
प्रशासकीय प्रमुख यादव भट्टराईका अनुसार, टेलिकमसँग साझेदारीमा स्थानीय सरकार स्वयंले गाउँपालिकाको भवन नजिकै टावर निर्माणको काम अगाडि बढाएको छ। “स्थानीयहरुको एकता र सहकार्यले मात्रै विकास सम्भव हुन्छ,” प्रमुख भट्टराईले भने, “अब सेवा आफ्नै भवनबाट दिइँदैछ।”
तर, मौसम बदलिएसँगै राष्ट्रिय प्रसारण लाइनमा समस्या आउने गरेको र नेटवर्क अझै पूर्ण सुधार हुन बाँकी रहेको जनाइएको छ।
उपाध्यक्ष पार्वती भण्डारीको तीन वर्षको कार्यकालले तलकोटमा महिलामैत्री नेतृत्व, विकासको गतिशीलता, र सेवाप्रवाहमा उल्लेखनीय परिवर्तन ल्याएको देखिन्छ। स्थानीय जनताको मर्म र आवश्यकतालाई बुझेर काम गर्न सकिने हो भने, गाउँमै समृद्धिको उज्यालो फैलन सक्ने सन्देश उनले दिएको पाइन्छ।
