बझाङ: बझाङको मष्टा गाउँपालिकामा विकास, शिक्षा, स्वास्थ्य र पूर्वाधारका क्षेत्रमा आमूल परिवर्तन ल्याउने बाटो खुलेको छ । गाउँपालिकाका अध्यक्ष ज्ञानबहादुर बोहराको अथक प्रयास र दिगो नेतृत्वको परिणामस्वरूप संघीय सरकारबाट २० करोड रुपैयाँभन्दा बढीको बजेट विनियोजन गरिएको छ ।
कहिल्यै पनि राज्यका प्राथमिकतामा नपरेको, सुविधाबाट टाढिएको र अवसरका ढोका पटक–पटक बन्द भएका मष्टामा अहिले भने आशाका ढोका खुलेका छन् । अध्यक्ष बोहरा एक गाउँपालिकाको मात्र होइन, अहिले जिल्लाकै युवा नेतृत्वको प्रतीक बन्न थालेका छन् ।
थुप्रै सरकारी तथा गैसस निकायहरूमा लामो समय काम गरेर व्यावहारिक अनुभव आर्जन गरिसकेका अध्यक्ष बोहराले गाउँपालिका सम्हालेदेखि नै ‘विकास, न्याय र जनताको भरोसा’ भन्ने मूल मन्त्रमा विश्वास गर्दै आएका छन् ।
अध्यक्ष बोहराको निरन्तर काठमाडौं यात्राको फलस्वरूप संघीय बजेटबाट मष्टाका विभिन्न ठाउँमा सामाजिक, भौतिक, शैक्षिक र पूर्वाधार विकासका महत्वपूर्ण योजना पारित भएका छन् । प्राप्त विवरण अनुसार निम्न योजना केन्द्रबाट स्वीकृत भएका छन्:
१. डुङ्ग्री–लेकी–खेतकोट–उकाली–भातेखोला–ढडार–मष्टा सडक स्तरोन्नति: रु. ९ करोड ६० लाख
२. धौलाभिर–घोडीलेक सडक निर्माण तथा स्तरोन्नति (मष्टा–७): रु. ३ करोड
३. देवसैन–रिलु–दय सडक: रु. ३ करोड
४. सामुदायिक विद्यालयको शैक्षिक गुणस्तर अभिवृद्धि कार्यक्रम: रु. १ करोड ५६ लाख
५. वडा नं. ४ को भातेखोला–ठाना बस्ति सुधार कार्यक्रम: रु. ४० लाख
७. गाउँपालिका हुँदै मष्टा मन्दिर पदमार्ग निर्माण: रु. २५ लाख
८. शारदा मावि, धेरवारको सुधार र खेलमैदान निर्माण: रु. २५ लाख
९. घोडीलेक सडक स्तरोन्नति (मष्टा): पुनः रु. ३ करोड
१०. कुलमष्ट्रजन मावि तथा प्राविधिक विद्यालयको मैदान मर्मत तथा घेरबार: रु. २० लाख
अध्यक्ष बोहराका अनुसार, संघीय सरकारको “रातो किताब” मार्फत अझै थुप्रै योजनाहरू विनियोजनको प्रक्रियामा छन् । यसले मष्टालाई आगामी केही वर्षभित्रै आर्थिक, भौतिक र सामाजिक दृष्टिले आत्मनिर्भर बनाउने सम्भावना थप प्रबल बनाएको छ ।
मष्टाका स्थानीय बासिन्दाहरूले बोहरालाई “गरिबी निवारणको आशा बोकेको नेता” का रूपमा लिँदै आएका छन् । उनी निर्वाचित भएदेखि नै गाउँपालिकामा सुशासन, पारदर्शिता र नतिजामूलक कामप्रति उनको प्रतिबद्धता झल्किएको देखिन्छ ।
बोहरा नेतृत्वमा गाउँपालिका कार्यालयले शिक्षा, स्वास्थ्य, सडक सञ्जाल, बस्ती सुधार, र धार्मिक पर्यटनलाई समान महत्व दिएको छ । मष्टा मन्दिरको पदमार्ग निर्माणदेखि लिएर ग्रामीण सडक विस्तारसम्मका कामहरूमा अब स्थानीय युवाको समेत रोजगारी सिर्जना हुने अपेक्षा गरिएको छ ।
मष्टा गाउँपालिकाको सम्पूर्ण टिमले एकजुट प्रयासमार्फत गरेको ऐतिहासिक पहलप्रति बधाई दिँदै अध्यक्ष बोहराले भने, “गाउँमा शिक्षाको उज्यालो फैलाउन, स्वास्थ्यलाई पहुँचयोग्य बनाउने र पूर्वाधार निर्माण गरेर गरिबी निवारण गर्न हामी प्रतिबद्ध छौं।”
उनले बजेट विनियोजनमा सहयोग पुर्याउने सबै संघीय मन्त्रालय, योजना आयोग, सांसदहरू र सरोकारवालाप्रति आभार प्रकट गर्दै भने, “यो सफलता मष्टाका जनताको साझा उपलब्धि हो।”
